Dy automjete të komunës së Zveçanit janë djegur qëllimshëm nga persona deri tani të panjohur në orët e para të mëngjesit të së premtes, ndërsa përveç dëmeve materiale nuk ka të lënduar.
Lajmin për KosovaPress, e ka konfirmuar drejtori i policisë për rajonin e veriut, Veton Elshani. Sipas Elshanit, ngjarja ka ndodhur rreth orës 01:40 të mëngjesit të 26 korrikut. Veturat, që u dogjën, ishin para ndërtesës të Komunës së Zveçanit.
“Rreth orës 1.40 dy vetura janë dëmtuar sipas informatave me koktej molotovi, policia është aty, sidoqoftë, policia është aty dhe jemi duke u marrë me rastin. Varësisht ku na dërgojnë njoftimet, atje shkojmë edhe ne. Njëherë për njëherë nuk kemi të arrestuar dhe nuk kemi të dyshuar, të lënduar nuk ka.. ju e dini që i kemi disa raste të zjarrvënies, janë duke u hetuar këto raste por deri tash nuk kemi të arrestuar për rastin e mbrëmshëm”.
Kryetari i Komunës së Zveçanit, Ilir Peci tha se në orët e hershme të mëngjesit ka marrë lajmin nga Policia e Kosovës për ngjarjen e ndodhur dhe si rrjedhojë ka njoftuar autoritetet.
“Si pasojë për momentin të panjohur kanë bërë djegien e dy veturave zyrtare në parkingun e komunës. Unë si kryetar komune e dënoj këtë akt dhe i lus institucionet e sigurisë e shtetit që sa më shpejt të arrestohen ata persona dhe të dalin para drejtësisë”.
Ai nuk e di shkakun e këtij sulmi, por thotë se për momentin nuk kemi diçka më shumë të flasin, policia është duke hetuar rastin.
“Sigurt jemi për momentin tash e tre muaj që jemi këtu, deri sot në orët e hershme nuk ka ndodh një gjë e tillë, mirëpo ndodhin ende nuk mundemi të japim diçka, do të thotë policia janë ata që sa më shpejt që është e mundur, do ta verifikojnë se çka ka ndodh dhe prej kujt ka ndodh”, duke thënë se ata nuk i frikëson ky akt dhe po vazhdojnë punën e tyre si çdo ditë tjetër”.
Ndërkohë, sipas burimeve të Kosova Press-it, djegia e veturave sot dhe disa muaj më herët, po ndodhin nga persona të mitur. Zveçani është një nga katër komunat në veri të Kosovë, që janë të banuara me shumicë serbe. Në këtë pjesë të territorit të Kosovës edhe në të kaluarën ka pasur djegie të veturave dhe dëmtim të pronës
