Kolegji i Posaçëm i Apelimit (shkallë e dytë e vetingut) ka përjashtuar nga sistemi i drejtësisë gjyqtarin e Gjykatës së Tiranës, Besnik Hoxha.
Vendimi i KPA-së është shpallur këtë të enjte, duke ndryshuar vendimin e Komisionit të Pavarur të Kualifikimit, i cili konfirmoi Hoxhën në detyrë rreth një vit më parë.
Vendimi është marrë nga trupi gjykues i Kolegjit i kryesuar nga Albana Shtylla, relator Sokol Çomo dhe anëtare Ina Rama, Natasha Mulaj e Mimoza Tasi.
Vendimi i KPK-së për të konfirmuar Hoxhën ishte kundërshtuar nga Operacioni Ndërkombëtar i Monitorimit dhe më pas u ankimua nga Komisioneri Publik, i cili pretendonte se vendimi i KPK-së është i cënueshëm në të tri kriteret e rivlerësimit.
Sipas komisionerit Flroian Ballhysa, gjyqtari Besnik Hoxha ka kryer deklarim të pasaktë dhe të pamjaftueshëm të pasurisë dhe se ishte “përpjekur të paraqesë në mënyrë të pasaktë pasurinë në fjalë dhe interesat e vërteta pasurore të tij”.
Komisioneri renditi gjatë seancës në KPA një sërë rrethanash që sipas tij duhej të ishin vlerësuar ndryshe nga Komisioni i Pavarur i Kualifikimit, duke theksuar se subjekti nuk kishte arritur të provonte të kundërtën e barrës së provës.
Për pasurinë: godinë banimi 3-kate në Shkodër Komisioneri arsyetoi se zbatimi i parimit të proporcionalitetit siç ka arsyetuar KPK është i pavend.
“Është e qartë se parimi i proporcionalitetit nuk mund të merret dhe interpretohet i shkëputur për relativizuar pasaktësinë në deklarim dhe pamjaftueshmërinë e burimeve të ligjshme në krijimin e pasurisë godinë banimi 3-kate të ndodhur në Shkodër, duke u shmangur kështu, nga detyrimi për deklarim me vërtetësi të tërësisë së pasurisë dhe shpjegimit bindshëm të ligjshmërisë së burimit të krijimit të saj”, thuhej në parashtrime.
Edhe në lidhje me një apartament në Tiranë i deklaruar si adresë vendbanimi e subjektit, Komisioneri Publik këmbënguli se në këtë rast subjekti kishte paraqitur një situatë të ndryshme faktike “nga sa kanë rrjedhur ngjarjet dhe interesat e tij pasurore me këtë pasuri, si dhe momentit të posedimit të saj”.
Gjithashtu, Komisioneri Publik ngriti dyshime dhe për kontaktet e gjyqtarit Besnik Hoxha me një sërë personash dhe përdormin e mjeteve të tyre, ndërkohë që kishte gjykuar më herët çështje me këto palë. Sipas Komisionerit Publik, këto raste duhet të vlerësoheshin për të gjykuar integritetin e magjistratit.
LEXO EDHE:
Redaksionale/ Klani i inceneratorëve Zoto-Mërtiri blejnë gjykatën, por jo të vërtetën
