Gjykata e Posaçme kundër Korrupsionit dhe Krimit të Organizuar ka lënë në fuqi masat e sigurisë për mjekët e spitalit Onkologjik dhe farmacistin.
Më konkretisht ka caktuar masën e sigurimit “arrest në shtëpi” për mjekun Edmond Gashi dhe farmacistin Florian Marku, ndërsa ka caktuar masën “detyrim paraqitje” për mjeket Brikena Qirjazi e Alketa Ymeri, si edhe për stafin administrativ Emiljano Lela e Drilona Krishta, si dhe për shtetasin Halil Gashi.
Për Drilona Kishtan për të cilën ishte vendosur masa e sigurisë “Detyrim Paraqitje” e akuzuar për veprën penale “Shpërdorim Detyre” nuk është bërë ekzekutimi i vendimit penal, pasi ajo ishte jashtë shtetit dhe është vendosur njoftim në kufi.
Ata akuzohen për tre vepra penale: “kontrabandë ilaçesh”, “shpërdorim detyre” dhe “korrupsion”. Dy veprat e para penale ishin ngritur edhe nga Prokuroria e Tiranës, ndërsa me kalimin në SPAK është shtuar edhe akuza e korrupsionit.
Ndaj mjekëve SPAK ka nisur dhe hetimin pasuror . Prokuroria e Posaçme ka kërkuar nga hipotekat dhe bankat e nivelit të dytë informacion për asete apo pasuri për të gjithë mjekët dhe zyrtarët e Onkologjikut.
Gjatë seancës së sotme avokatët e mjekëve kërkuan që SPAK të shpallte moskompetencën dhe të kalonte sërish tek Prokuroria e Tiranës, pasi sipas tyre vepra penale e korrupsionit nuk qëndron dhe kështu kjo dosje nuk është objekt i hetimit të SPAK.
Avokati i mjekut Edmond Gashi në një prononcim për mediat pas seancës tha se kërkuan masë më të lehtë se ajo “arrest në shtëpi”, pasi mjeku Gashi ka 50 pacientë në pritje që duhet të marrin kurim.
“Klienti im Edmond Gashi kërkoi në gjykatë masë më të butë sigurie, për shkak se ka pacientë për të trajtuar. Janë 50 pacientë të cilëve u ka dalë biopsia dhe duhet të marrin kurim nga mjeku i tyre. Masa ‘arrest në shtëpi’ e pengon të shkojë në klinikën private, atje ku ka aparaturat”, tha avokati Xhoi Nela.
Në spitalin Onkologjik mjekët kishin krijuar një skemë abuzive të transfermit të pacientëve me kancer drejt klinikave private.
Nga hetimi i kryer nga Prokuroria e Tiranës, ka rezultuar se pacientëve të diagnostikuar me tumor nuk u jepej trajtimi i duhur mjekësor në spitalin shtetëror dhe më pas drejtoheshin në klinika private. Mjekët e spitalit publik i orientonin pacientët për t’i operuar drejt klinikave private, shpesh herë dhe pa qenë e nevojshme për ta, me qëllimin e vetëm për të përfituar prej tyre.
Po ashtu, janë konstatuar raste të blerjes së ilaçeve me vlera të konsiderueshme për kimioterapi, nga farmaci të cilat këto medikamente i tregtonin pa pullën fiskale dhe me kod të prishur, duke krijuar dyshimin në lidhje me autenticitetin e këtyre barnave.
Për këtë rast ka patur një hetim të cunguar nga prokurori i Tiranës, Bledar Valikaj, bashkëshorti i deputetes së PS-së, Ermonela Felaj, teksa aktualisht asnjë person nuk ndodhet në burg.
