Policia e Tiranës ka publikuar detaje të reja nga ngjarja e ndodhur në orët e para të ditës së sotme në një lokal në Rrugën e Kavajës, ku mbetën të plagosur me armë zjarri 3 persona.
Uniformat blu bëjnë me dije se janë arrestuar dy shtetasit të identifikuar si Dardan Zalli dhe Arjan Dushaj të cilët dyshohet se kanë ndihmuar autorin e ngjarjes.
Sipas një komunikate për shtyp policia thotë se ka shpallur në kërkim shtetasi Edison Elezaj, 32 vjeç, për veprën penale “Plagosja e rëndë me dashje”, ky i fundit gjatë një feste familjare plagosi me armë 3 të afërm.
Mësohet se autori i dyshuar i ngjarjes Edison Elezaj, është djali i biznesmenit Hajri Elezaj, i njohur si pronar i “Ujit Lajthiza”.
Gjithashtu policia bën me dije se arma është sekuestruar në cilësinë e provës.
- Njoftimi i policisë:
“Në vijim të veprimeve të shpejta hetimore, nga Sektori për Hetimin e Krimeve të Rënda në DVP Tiranë, është bërë i mundur dokumentimi i plotë i autorësisë së ngjarjes, dhe si rezultat:
– u shpall në kërkim shtetasi E. E., 32 vjeç, për veprën penale “Plagosja e rëndë me dashje”, parashikuar nga neni 88/2 i Kodit Penal;
– u arrestuan shtetasit A. D., 38 vjeç, dhe D. Z., 35 vjeç, të dy banues në Tiranë, për veprën penale “Veprime që pengojnë zbulimin e së vërtetës”, kryer në bashkëpunim, parashikuar nga neni 301/25 i Kodit Penal.
Gjithashtu, gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes.
Pas kryerjes së krimit nga shtetasi E. E., dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj.
Materialet i kaluan Prokurorisë”, thuhet në njoftim.
Lexo edhe:
Djali i Hajri Elezajt plagos tre persona me armë pa leje, policia “zbut” ngjarjen
