Janë zbardhur detaje të reja nga operacioni i koduar “Imposter”, ku Policia e Lezhës arrestoi dy persona dhe shpalli në kërkim një tjetër, të cilët akuzohen se nëpërmjet mashtrimit duke u prezantuar si zyrtarë vendorë u merrnin para biznesmenëve.
Në pranga u vunë shtetasit Shkëlqim Domi, 35 vjeç dhe Saimir Sallaku 37 vjeç, të dy banues në Shijak. Ndërsa është shpallur në kërkim shtetasi Shefik Kurti 63 vjeç, banues në Itali.
Burime për mediat bëjnë me dije se mashtruesit prezantoheshin si kreu i Bashkisë së Lezhës, Pjerin Ndreu, ndërsa pre e mashtrimit ka rënë biznesmeni Ylli Ujkaj, njëherazi edhe presidenti i ekipit të basketbollit “Besëlidhja”.
Mashtruesit kanë biseduar në aplikacionin “Signal” me biznesmenin Ujka më 14 Korrik, duke u prezantuar si Pjerin Ndreu dhe i kërkuan 15 mijë euro. Biznesmeni pa u menduar dy herë ua ka dhënë 15 mijë euro mashtruesve Shkëlqim Domi dhe Saimir Sallakut, të cilët kanë bashkëpunuar edhe me Shefik Kurtin.
Më 17 Korrik ata kanë tentuar serish t’i marrin biznesmenit Ylli Ujka një tjetër shume të madhe parash me një tjetër skemë mashtrimi, por kanë dalë zbuluar.
Ndërkohë, Policia e Lezhës po bashkëpunon me atë të Tiranës ku këta shtetas me të njëjtën skemë mashtrimi kanë tentuar t’i marrin një biznesmeni 20 mijë euro.
“Nga veprimet hetimore dyshohet se shtetasit Shkëlqim Domi dhe Saimir Sallaku, në bashkëpunim me shtetasin Shefik Kurti, më datë 14.07.2024, kanë përfituar 15 000 euro, nga administratori i një operatori ekonomik, duke komunikuar me të në aplikacionin “Signal”, në emër të përfaqësuesve të institucioneve vendore. Më datë 17.07.2024, ata kanë tentuar të përfitojnë një tjetër shumë të madhe parash, nga ky shtetas, me anë të së njëjtës skemë. Në bashkëpunim me strukturat hetimore të DVP Tiranë, vijojnë hetimet për zbardhjen e një rasti të ndodhur një Tiranë, ku këta shtetas kanë tentuar të përfitojnë 20 000 euro, nga një shtetas, me anë të kësaj skeme mashtrimi.” – thuhet në njoftimin e Policisë.
Dy të arrestuarit dhe i shpallur në kërkim akuzohen për veprën penale “Mashtrimi” me pasoja të rënda, kryer në bashkëpunim.
Kjo nuk është hera e parë kur biznesmenët bien pre e mashtrimit, duke u dorëzuar shuma të mëdha parash mashtruesve. Kjo skemë ka ndodhur dhe në shumë raste të tjera me biznesmenë të tjerë, teksa mashtruesit janë prezantuar si kryebashkiaku i Tiranës, Erion Veliaj, ministri i Brendshëm, Taulant Balla apo ish-kreu i Kadastrës, Artan Lame.
Por dhënia me kaq lehtësi e parave nga ana e biznesmenëbe kur ua kërkojnë deputetët, kryebashkiakët apo ministrat e mazhorancës, ngre dyshime se dhënie të tilla “huadhënie/dhurimi/ndihme” janë aq të shpeshta sa biznesmenët nuk mendohen dy herë as sa të bëjnë një telefonatë verifikuese.
