Pas betimit si deputet në Parlamentin Europian, Fredi Beleri është zgjedhur edhe si nënkryetar i Komisionit të Peticioneve në këtë institucion.
Beleri ka deklaruar se këtë vendim e ka mësuar nga qelia, teksa ka falenderuar që e kanë zgjedhur.
“Falënderoj kolegët e mi që më zgjodhën nënkryetar të Komisionit të Peticioneve, gjë për të cilën mësova nga brenda burgjeve shqiptare”, tha Beleri, duke shprehur optimizmin e tij se së shpejti do të lirohet dhe do të jetë në gjendje të kryejë detyrat e tij i pashqetësuar.
Fredi Beleri u zgjodh si deputet i Parlamentitn Europian nga partia “Demokracia e Re” e kryeministrit grek Kyriakos Mitsotakis. Ai arriti të merrte 237 mijë vota duke qenë eurodeputeti i katërt më i votuar në shtetin helen.
Javën e kaluar, Belerit iu dha leje nga Drejtoria e Burgjeve për të shkuar në Strasburg, ku bëri betimin si eurodeputet, pasi fitoi zgjedhjet i futur në listën e kryeministrit grek Kiriakos Mitostakis dhe Demokracisë së Re.
Beleri po vuan dënimin në Shqipëri, pasi është dënuar me 2 vite burg nga Gjykata e Posaçme e Apelit, pasi është shpallur fajtor për krime zgjedhore, teksa u arrestua dy ditë para zgjedhjeve lokale të vitetit 2023 teksa kandidonte për postin e kryetarit të Bashkisë Himarë.
