Nga Basir Çollaku
“S’e deshe Vanin magazinjer ? …Na, mbaje tani krushk”.
Kështu i ngjau dhe Edi Ramës me Belerin kryebashkiak i pamandatuar i shkarkuar e dënuar, me histori e dosje fort të ngatërruar, por eurodeputet i betuar, pas një leje shpërblyese alla-soj nga çdrejtësia. Tavo, denoncues dje i Ramës hajdut, bie dakort sot të jetë vasal e aksioner në hajninë e re elektorale.
Në Bashkinë e Tiranës, grupet kriminale mbijnë si çadrat e plazhit, teksa kryetari Veliaj pret fermanin për kafaz, të Prokurorisë familjarisht. Beqja, dy-metroshi i parë qeveritar, akuzuar për hajdut pas tre kolegëve më herët ndodhet e po lodhet në qeli duke rritur gjasat t’i shpëtojnë rrugës sekretet me shefin. Nga Hanoveri, një ngarkesë telashesh udhëton drejt Tiranës, ku një dosje kokaine për Olsin, po turfullon keqas të vëllanë. Olafi i Krifcës ngeci në Parlament dhe në prokurorinë Speciale. Dumani, më shumë trazoi se qetësoi duartrokitësit e pandehur të mazhorancës në Kuvend. Olta e Bela nuk dinë se nga do u vijë. Damiani, Tao, Ulsiu e Fatmiri mendojnë se ia hodhën, por dardhës i ka dalë bishti përpara.
Kreu i KLSH, Shehu shtangu njerëzit me denoncimet tronditëse në komision parlamentar, se si po na vrasin ushqimet e ilaçet, por mediet mbyllin sqepin se merakosen oligarkët. Kongresi i PS me 27 korrik që ngjan si gijotinë franceze, ka vënë gatitu qeverinë e deputetët, me dorë në llampën e “Aladinit” me shpresë së dalin pa lagur. Bashkiakët shohin ekstradimet e qërojnë orizin lokal, teksa pakësohen nga udhëtimet drejt qelive. Në prokurori e gjykata rrëshket nën dorë lista e çmimeve verore, me ngritje për shkak pushimesh e taksash eprorëve. Policia mënjanohet nga trarët e port-aeroporteve, pa harruar të hedhë një sy nga sky-encrot e Francës.
Opozita endet mes dashurisë platonike e hallit për ngjizje të fortë politike. Partitë e reja ngjajnë me kokë e xhep nga plakat, por telefon nga ambasadat. Mediet i bëjnë temena qeverisë për rrjedhjet në hesapet e financave. Në maternitete lehin më shumë qentë rrotull godinës, sesa dëgjohen qarje të lindjeve të jetës. Shoqëria civile, rahmet pastë, ka ikur në emigracion duke harruar gjininë. Diaspora me kokë mënjanë mendon se kujtesa atdhetare të dielën, mëkëmb shpresën e tulatur prej dekadash. Diplomatët bëjnë sehir e lëshojnë mufka me sheqer pushtetesh, teksa gudulisen nga dashnoret vendase, pa harruar prekje biznesesh. Europiani u mbyll me sukses për bastet e skedinat në të zezë, duke dorovitur majmur “madhërinë” lejues me hisen e tij. Eskortat ngelën në hall zgjuar, vendosin çfarë duan te klientët zullapër zyrash, gjumashë me portofol hapur e moral shprishur.
Turistët marrin bukë, djathë e domate, një shishe ujë me vete e flenë nën hije shkurresh, ndërsa shezlongjet kushtojnë për një javë, sa pensioni i një viti. SPAK matet shtatë herë e pret një herë, kur të kërkuarit janë rehatuar në azile. Importojmë çdo gjë, eksportojmë asgjë, prodhojmë korrupsion më shumë se megavat energji. Vëllezërit nga Kosova zgjedhin dashuri turistike greke e turke, sepse faturat shqiptare janë konkurruese me ataket kardiake. Protestuesit demokratë ndezin shpesh zjarre, por dikush nuk harron të marrë në telefon zjarrfikëset lëvizëse.
Spitalet janë bërë si dhoma gazi të nazistëve e shkollat si kampe verore me pagesë. Domate greke, mollë italiane, trangull maqedonas, groshw egjiptiane, patate marokene, miell serb, djathë me allçi e oriz kauçuku. Vaji i ullirit “ngeli me barrë” vjet, i trefishuar në çmime sivjet.
Kullat e betonit kanë dalë në guidë bashkë me firmëtarin Rama nga Tiranë nëpër rrethe, ku ia bënë sefte te Beci i FSHZH-sw dhe Bajrave në Shkodër, për të mos e ndaluar gjezdisjen gjatë nëpër bregdet. Censusi, pas dy vitesh mori guximin të rrumbullakosë aq sa i tha qeveria numrin e shqiptarëve, duke e përafruar me numrin e pemëve të mbjella teorikisht të Veliajt.
Zgjedhjet e reja kanë hapur thasë trafikantësh, biznesmenësh, politikanësh, tenderash, koncensionesh. Shumë ujq e rioshë nëpër parti e rrotull saj, të ngrefosur para kohe, gdhihen kandidatë e ngrysen të ngratë, zgjohen sterilë e darkosen të diplomuar servilë. E, me sa shihet, vapa afrikane do të ikë, por temperatura nëpër kokë njerëzish do të mbesë.
Vendi ka mbërritur në një udhëkryq vrasës, ku një grua i thotë mikeshës së saj, ma mbaj pak këtë kopilin, ta shaj një herë atë kurvën.
