Është rritur numri i banorëve që janë paraqitur në spitalin e Bulqizës me simptoma helmimi.
Mësohet se që prej pasdites së djeshme e deri më tani kanë shkuar 56 pacientë që kanë shkuar në spital për të marrë ndihmë mjekësore, pasi kanë patur temperaturë dhe të vjella. Pacientët janë kryesisht të moshës 30-40 vjeç, por mes tyre ka pasur edhe fëmijë.
Ende nuk ka një arsye konkrete se çfarë mund ta ketë shkaktuar helmimin, pasi pacientët e dyshuar të helmuar nuk janë qenë të gjithë të një lagjeje apo fshati, por të shpërndarë në Bashkinë e Bulqizës.
Dyshimet paraprake janë se ata mund të jenë helmuar nga uji i pijshëm. Mësohet se në Qytetin e Ri në Bulqizë, po bëhen punime në rrjetin e ujërave të zeza. Kjo ka ngritur dyshime se për shkak të ndonjë incidenti apo gabimi, ujërat e zeza, mund të jenë përzier me ujin e pijshëm, duke sjellë kështu edhe helmimin e banorëve.
Gjithsesi, nuk përjashtohet pista se ata mund të jenë helmuar dhe prej ndonjë ushqimi. Policia raporton se është ngritur grupi hetimor dhe nën drejtimin e Prokurorisë kanë nisur hetimet për zbardhjen e rrethanave dhe përcaktimin e shkakut të helmimit.
Kjo është një ngjarje e përsëritur në Bulqizë, pasi e njëjta situatë ndodhi edhe Qershorin e vitit të kaluar, ku ndërhyrja në rrjetin e ujit të pijshëm të fshatit Gjoricë shkaktoi helmimin e rreth 40 banorëve. Në atë kohë u tha se 64-vjeçari Kadri Muça, pronar i një HEC-i në zonën e Gollobordës, kishte montuar një tub plastik në rrjetin e ujësjellësit dhe kjo ka sjellë përzierjen e ujit të pijshëm të fshatit me ujërat e zeza. Banorët, pas konsumimit të ujit, përfunduan në spital me shenja helmimi.
