Ndonëse jemi me pak se një vit para zgjedhjeve, qeveria ka menduar që të shpërblejë administratën duke iu rritur pagën.
Ministri i Financave Ervin Mete, deklaroi se nga rritja e pagave do të përfitojnë 135 mijë punonjës të administratës publike dhe aplikimi do të nisë nga data 1 korrik.
“Nga rritja e pagave përfitojnë 135 mijë punonjës të administratës publike. Paga mesatare në sektorin publik arrin në 150 mijë lekë. Pagat e rritura fillojnë të aplikohen nga 1 korriku, me kosto prej 11 miliard lekë për 6 mujorin e dytë të vitit 2024 dhe me një kosto totale buxhetore prej afro 40 miliardë lekësh.
Ai theksoi se nga rritja e rrogave do të përfitojnë: “Punonjësit e sistemit arsimor parauniversitar; punonjësit e sistemit shëndetësor; punonjësit e sistemit të sigurisë së vendit (Policia e Shtetit, Policia e Burgjeve, Garda e Republikës, Forcat e Armatosura, Mbrojtja nga zjarri dhe shpëtimi); si edhe punonjësit e nivelit zbatues dhe mbështetës të administratës shtetërore”, tha ministri Mete.
