Një zjarr i përmasave të mëdha ka rënë pasditen e sotme rreth orës 18:55 minuta në qytetin e Shkodrës, pranë tregut të rrobave të përdorura. Policia ka evakuar banorët nga banesat përreth.
“Rreth orës 18:55, në lagjen “Ndoc Mazi”, në një treg me rroba të përdorura ka rënë zjarr. Zjarrfikësit së bashku me policinë menjëherë kanë shkuar në vendngjarje.
Shërbimet e Policisë po bëjnë evakuimin e banorëve nga banesat që rrezikohen nga zjarri. Zjarrfikësit po punojnë intensivisht për shuarjen e zjarrit.
Grupi hetimor nën drejtimin e Prokurorisë po punon për zbardhjen e shkakut të rënies së zjarrit.”- njofton policia.
Në tregun e rrobave të përdorura është dëgjuar edhe një shpërthin, dyshohet bombol gazi.
Zjarri, siç mund ta shihni edhe në videot e mëposhtme, ka përmasa tejet të mëdha dhe po përhapet me shpejtësi.
Fatmirësisht, deri më tani nuk raportohet për të lënduar, por për dëme të shumta materiale.
Flakët kanë përfshirë edhe disa banesa në tregun e rrobave të përdorura.
Mjetet zjarrfikëse nga Ulqini, Tivari, Lezha dhe Malësia e Madhe kanë mbërritur në vatrën e zjarrit.
Pritet të mbërrijë edhe helikopteri i emergjencave civile i cili u kërkua nga Kryetari i Bashkisë për neutralizimin e vatrës së zjarrit.
“Me qëllim evakuimin e banorëve dhe krijimin e perimetrit të sigurisë, të gjitha shërbimet e Drejtorisë Vendore të Policisë Shkodër dhe Forcat Kombëtare të Sigurisë Njësia Shkodër, janë angazhuar maksimalisht dhe ndërkohë po ndihmojnë zjarrfikësit për të vënë nën kontroll flakët e zjarrit në tregun me rroba të përdorura.
Shërbimet e Policisë kanë evakuuar të gjithë banorët dhe kanë vendosur perimetrin e sigurisë.
Po vijon intensivisht puna për shuarjen e zjarrit.”- njoftoi policia në një tjetër reagim.
Burime mediatike bëjnë me dije se policia dyshon se zjarri në tregun e të përdorurave është vendosur qëllimisht.
- Sali Berisha hedh dyshime mbi zjarrin
Lideri demokrat Sali Berisha ka hedhur dyshime të forta se çfarë fshihet pas zjarrit që po zhduk tregun e rrobave të përdorura.
Berisha deklaron se në Shkodër po ndodh një krim shtetëror pasi tregu dhe disa banesa pranë tij po digjen që të ndërtohen pallate.
“Mafia e pushtet-banda në Shkodër djeg tregun dhe banesat për ndërtim të pallateve! Krim shtetëror mafioz”, shkruan Berisha.
