Policia e Kosovës në orët e pasdites pas hetimeve në lidhje me rastin e Banjskës në bashkëpunim me Agjencinë Kosovare të Inteligjencës, ka bastisur disa lokacione ku ndodhej armatimi i fshehur, nga ish-pjesëtarë të Mbrojtjes Civile dhe pjesëtarë të grupit terrorist të Banjskës.
Lokacioni i parë është në veri të Mitrovicës, në afërsi të Tre Rrokaqiejve dhe rasti ka të bëjë me Marjan Radojeviç që është person në kërkim për Banjskën. Ndërsa një tjetër lokacion që është bastisur është në rrugën “Çeta e Minatorëve” në Mitrovicë të Veriut e që lidhet me të dyshuarin tjetër gjithashtu person në kërkim Zharko Cvetkoviç.
Gjatë këtij operacioni policor është sekuestruar: Tri armë të gjata AK-47, katër karikatorë me 60 fishekë, një krehër me 11 fishekë, një këllëf revoleje dhe një çantë ushtarake.
Një rrip brezi me 25 fishekë për armë gjuetie, 23 fishekë për armë gjuetie, pistoletë TT me një karikator me tetë fishekë, tre karikatorë me nga tetë fishekë, dy karikatorë në fotrollë, 28 fishekë për armë të gjata, 10 krehër me fishekë të armës së gjatë (99 fishekë), një kuti me fishekë 7×62, katër pastruese të armës, kuti me lëndë të dyshimtë.
Po ashtu janë gjetur armë e gjatë me bajonetë, një pistoletë me dy karikatorë me nga tetë fishekë 7×62 dhe një fotrollë, çantë e zezë me pajisje për pastrim të armës, dy kuti me nga 50 fishekë 7×62, tre karikatorë me fotrolla me nga tetë fishekë, armë e gjatë gjuetie me çantë.
Policia ka sekuestruar edhe iriqë metalik, jelek i brendshëm antiplumb, 30 copë mjet i dyshuari eksploziv TM 100, një uniformë, çantë e zezë me pajisje të ndihmës së parë dhe karikues për radiolidhje.
