Gjykata e Tiranës ka caktuar masën e sigurisë arrest me burg për dy të arrestuarit në lidhje me dhunimin e avokatit, Sokol Mëngjesi. I dyshuar si organizatori i sulmit, Dritan Nano dhe dhëndrit të tij, Dorian Alia i përfshirë në dhunimin e avokatit Mëngjesi u lanë në arrest me burg.
E njëjta masë u caktua edhe për tre personat e tjerë, të cilët janë në kërkim. Prokuroria kishte kërkuar burg për dy personat, ndaj të cilëve rëndojnë akuzat plagosje e rëndë me dashje kryer ne bashkëpunim, kundërshtim dhe goditja e gjyqtarit po e kryer ne bashkëpunim. Edhe për Drivald Alia, Elton Kasaj dhe Romario Tabaku, prokuroria ka kërkuar caktimin e masës së sigurisë arrest me burg në mungesë për të njëjtat akuza si Nano e Alia.
- Prokuroria qëndrim ndryshe nga Policia
Prokuroria ka mbajtur një qëndrim ndryshe nga policia e Tiranës, lidhur me akuzën e ngritur ndaj autorëve që dhunuan avokatin Sokol Mëngjesi.
Prokuroria i çon ata me akuzën për “plagosje e rëndë me dashje kryer në bashkëpunim” dhe “goditje për shkak të detyrës”, ndërsa policia e regjistroi çështjen me akuzën “vrasje e mbetur në tentativë, kryer në bashkëpunim”.Ndërkohë të dy ata, Nano dhe Alia, kanë mohuar akuzat duke thënë se nuk ka qenë një sulm i planifikuar. Nano, i cili dyshohet se ka organizuar sulmin, ka deklaruar se nuk ka pasur dijeni, ndërsa dhëndri i tij i ka qëndruar deklaratës së parë, duke thënë se e ka parë rastësisht dhe e ka qëlluar në moment.
Kujtojmë se vijojnë të jenë në kërkim tre autorët e tjerë, Drivald Alia, Romario Tabaku dhe Elton Kasaj, teksa policia ka vënë 20 mijë euro shpërblim për këdo që jep informacion për arrestimin e tyre.
Sakaq, Mëngjesi ndodhet në gjendje kritiken për jetën në spitalin e Traumës.
- Si është gjendja shëndetësore e Sokol Mëmgjesit, të hënë do të tentohet zgjimi
Gjendja shëndetësore e avokatit Sokol Mëngjesi që pas futjes në intubim mbetet e njëjtë. Mësohet se gjendja e tij është me të njëjtat parametra. Mësohet se avokati vazhdon të jetë në monitorim intensiv nga stafi mjekësor në reanimacion, ku i bëhen ekzaminime herë pas here për të parë gjendjen e tij.
Sipas burimeve nga spitali i Traumës për “Balkanweb” do të pritet deri të hënën dhe nëse gjendja do të jetë e njëjtë siç po vijon dhe nuk do ketë përkeqësim, do të tentohet zgjimi, për ta nxjerrë nga intubimi. Pra 48 orët e ardhshme janë deçizive.
- Dhunimi i avokatit
Ngjarja e rëndë ka ndodhur më 29 maji pasi avokati Sokol Mëngjesi ka lënë djalin në shkollë në zonën e ish-Bllokut në kryeqytet. Tre autorët i kanë zënë pritë pranë një kopshti, ku avokati kishte dërguar të birin dhe e kanë goditur me grushte e sende të forta në fytyrë dhe trup. Bëhet me dije se avokati i cili tashmë ndodhet në intubim, ka pësuar dy fraktura, dëmtime te zona e ballit dhe pas koke dhe nga këto goditje.
Gjithashtu ka pësuar dëmtime në pjesën e trurit dhe hemorragji të vogël. Partia Demokratike është shprehur se ky ka qenë sulm politik i urdhëruar nga kryeministri Edi Rama ndërsa policia është shprehur se ngjarja ka ndodhur për shkak të detyrës.
Në lidhje me ngjarjen janë në kërkim janë 21-vjeçari, Drivald Alia, 33-vjeçari, Elton Kasaj dhe 26-vjeçari, Romario Tabaku. Tabaku ishte personi që ka larguar me makinë autorët e sulmit nga vendngjarja. Për arrestimin e personave në kërkim policia ka vënë 20 mijë euro shpërblim për ato që japin informacion të vlefshëm që ndihmon në kapjen e autorëve.
