Nuk ndodh vetëm në rrugën “4 Dëshmorët” në Tiranë, por siç ndodh shpesh në Shqipëri, edhe aty, dy fqinj po përplasen për pronën. Gjithçka ka nisur 18 vite më parë kur familja Doko, do të ndërtonte në një truall mbi të cilin kishte pretendime Tahsim Guxha. Ky i fundit arriti që të fitojë betejën ligjore deri në Gjykatën e Lartë, pas shumë përpjekjeve të familjes kundravajtëse për të mos prishur objektin pa leje. Megjithatë edhe pasi u shpreh Gjykata e Lartë, objekti pa leje nuk u prish për shkak se IKMT-ja nuk kishte mjete në dispozicion.
Ngjan e pabesueshme, por është e vërtetë. Në një përgjigje që kryeinspektori i IKMT-së i kthen zyrës së përmbarimit Tiranë, shprehet se e ka të pamundur mbështetjen pasi nuk disponon mjete për prishje, me pretekstin që të gjitha janë të angazhuara në terren.
Megjithatë Piranjat bënë një vëzhgim në terren ku konstatuan edhe mjete të parkuara, të paangazhuara në terren. Për të verifikuar nëse ishin me defekt apo jo, duhej të pyetej pranë IKMT-së, vetë kryeinspektorin Ervin Hoxha, i cili sapo mësoi për prezencën e gazetarit në institucion, dha urdhër që dera që të çon në zyrën e tij të bllokohej. Ndërsa priste daljen e kryeinspektorit, stafit iu kërkua të largohej nga godina pasi sipas agjenda e kryeinspektorit ishte tepër e ngjeshur. Gjatë kohës që piranjat prisnin, të gjithë punonjësit ishin të ngujuar në katin e fundit të godinës së IKMT-së, për shkak të bllokimit artificial të derës me chip. Teksa minutat kalonin, një tjetër punonjës kësaj here i departamentit të marrëdhënieve me median në IKMT u paraqit për të dhënë sqarime lidhur me çështjen në fjalë. Egon Loli, specialist pranë zyrës së Marrëdhënieve me Publikun dhe Median pranë IKMT-së, sqaroi se vendimi për prishjen e objektit pa leje në truallin e qytetarit Tahsim Guxha do të ekzekutohej brenda muajit qershor.
Gjatë intervistës me denoncuesin Tahsim Guxha pranë pronës së tij, pjesëtarë të familjes Doko u konfliktuan me të dhe me stafin e piranjave, ku ofendimet dhe kërcënimet nuk munguan./Piranjat
