Konferenca e Kryetarëve, në përfundim të mbledhjes së sotme, ka miratuar projekt-rezoluta “Për thellimin e reformave për mirëqeverisjen, sundimin e ligjit dhe antikorrupsionin për Shqipërinë 2030 në Bashkimin Europian”.
Socialistës kanë nxituar për ta futur nëseancën plenare të ditës së hënë në Kuvend, për ta miratuar. Bëhet fjalë për propozimin e socialistëve për ngritjen e një komisioni të posaçëm parlamentar për të forcuar luftën kundër korrupsionit dhe shtetin e së drejtës.
Në mbledhjen e Konferencës së Kryetarëve, ky projekt-rezolutë ka marrë vetëm 9 votat e anëtarëve të mazhorancës, teksa opozita nuk ka marrë pjesë në votim.
Pas mbledhjes, kryetarja e Këshillit Kombërtar të Integrimit, deputetja Jorida Tabaku ka shpjeguar edhe arsyet përse kanë abstenuar dhe nuk e kanë votuar, duke nënvizuar se vullneti politik për këtë nismë ka qenë i vonuar nga mazhoranca socialiste.
“Ka dy elementë që duhet të marrim në konsideratë. Së pari PD ka vite që kërkon që lufta ndaj korrupsionit të kthehet në prioritet kombëtar. Unë nuk besoj se mazhoranca sot e ka lartësinë morale që të në predikoj ne për luftën kundër korrupsionit, pasi nëse sot kemi një sistem të ngritur për të stimuluar korrupsioni me ligje me porosi, kjo është si rezultat i mazhorancës. Së dyti, janë një pjesë funksionesh me ngritjen e komisionit të posaçëm që i takojnë Këshillit Kombëtar të Integrimit. Janë edhe një pjesë që lidhet me pikëpamjen e mbikëqyrjes, raportimit dhe monitorimit që nuk i bën dot mazhoranca, pasi mazhoranca nuk mund të mbikëqyrë veten. Parlamenti sot nuk ka nevojë për një rezolutë tjetër që ndoshta nuk zbatohet dhe të mos miratojë copa letre që dihet se çfarë fundi kanë. Janë një sërë elementesh që lidhen me punën e Këshillit të Integrimit. Në rezolutën e Partisë Socialiste thuhet që reformat janë të pakthyeshme. Opozita është e tillë dhe për këtë është votuar, prandaj nuk e bën dot mazhoranca. Ne sot abstenuam nuk e votuam rezolutën dhe në mbledhjen e radhës së ditës së hënë do të diskutohet. Kjo kërkon vullnet politik që ka qene i vonuar nga mazhoranca.”
