Kreu i Prokurorisë së Posaçme (SPAK) po raporton këtë të martë në Komisionin e Ligjeve raportin vjetor për punën e SPAK gjatë vitit 2023.
Një prej anëtarëve të këtij komisioni është edhe deputeti socialist Eduart Ndreca, i cili është ulur në krah të Fatmir Xhafajt, vëllait të trafikantit të drogës Geron Xhafaj. Siç shihet edhe në fotot e mëposhtme, Eduart Ndreca është duke dëgjuar me vëmendje kreun e SPAK, teksa nuk ka asnjë pyetje për të.
Në operacionin e fundit të SPAK, ku u goditën 7 grupe kriminale dhe u lëshuan 50 urdhër-arreste pas bisedave në “Sky Ecc”, u arrestua edhe vëllai i Eduart Ndrecës, Armando Ndreca. Madje, ky i fundit u arrestua edhe disa javë më parë, ku u zbulua kultivimi i kanabisit brenda një stani, por u lirua dy ditë më pas nga Gjykata e Lezhës me pretendimin për mungesë provash.
Ajo që vlen të theksohet është se në dosjen e SPAK, siç shihet edhe në dokumentin e siguruar nga Boldnews.al, në bisedat mes kriminelëve në aplikacionin “Sky Ecc”, përmendet jo pak herë edhe deputeti socialist Eduart Ndreca.
Ky i fundit, “u fal” nga SPAK, duke i arrtestuar vetëm të vëllain, ndoshta kjo është edhe arsyeja pse është kaq i vëmendshëm deputeti socialist ndaj Dumanit.
