Filip Talo, emri i të cilit është lakuar për çështjen e dosjes së sigurimit të shtetit (për ish-Presidentin Ilir Meta), u thirr në Prokurorinë e Tiranës për të dëshmuar.
Pas marrjes në pyetje, Talo ka deklaruar: “Iu qëndroj pretendimeve që kam bërë dhe nuk dua të shqetësohet më familja ime”.
Filip Talo është personi kyç në dokumentet që Autoriteti i Dosjeve thotë që ka zbuluar për Ilir Metën se ka qenë bashkëpunëtor i Sigurimit të Shtetit.
Në qershor të vitit të kaluar Gjykata e Apelit detyroi përfundimisht Prokurorinë të regjistronte procedim penal ndaj Autoritetit të Dosjeve, pas kallëzimit të bërë kundër këtij institucioni, nga ish-presidenti Ilir Meta.
Meta bëri kallëzim ndaj këtij institucioni më 6 shtator 2022, pas akuzave dhe dyshimeve se ka qenë bashkëpunëtor i Sigurimit të Shtetit.
Ish-kreu i Shtetit sqaroi në kallëzim se ka marrë certifikatën e pastërtisë së figurës nga dy komisionet e ngritura në vitet ’90, si dhe nga vetë Autoriteti i Dosjeve në prill të vitit 2017, çka e përjashton nga detyrimi për t’u verifikuar sërish.
Në korrik të 2022-shit, pas një kërkese të mbërritur në e-email për të verifikuar ish-presidentin, Autoriteti i Dosjeve njoftoi Kuvendin se ka ndeshur me informacione dhe të dhëna mbi personazhin me profil të lartë politik.
