Janë zbardhur detaje të reja nga plagosja me armë zjarri e regjistruar pasditen e të shtunë në lagjen “Salo Halili” të Shkodrës.
Mësohet se 46-vjeçari Gentian Mithi ka plagosur me armë zjarri pistoletë në këmbë 24-vjeçarin Jaser Osmani, i cili ndodhet në spitalin e Shkodrës jashtë rrezikut për jetën.
Plagosja ndodhi pas një konflikti të çastit, teksa pas krimit autori Gentian Mithi u largua në drejtim të paditur dhe është shpallur në kërkim nga Policia e Shkodrës.
Burime për mediat pranë grupit hetimor bëjnë me dije se dyshohet se Gentian Mithi dhe Jaser Osmani e kanë nisur konfliktin e tyre në qendër të Shkodrës, në lagjen “Parrucë”. Gjithçka ka nisur pas një debati mes tyre për kalimin në vijat e bardha në rrugë.
Jaser Osmani po ecte në këmbë duke tentuar që të kalojë në anën tjetër të rrugës pikërisht në vijat e bardha, ndërsa në atë moment Gentian Mithi ka qenë duke kaluar me automjet.
24-vjeçari ka pretenduar se ishte e drejta e tij për të kaluar në rrugë ndërsa Mithi pretendoi se duhej të kalonte ai me makinë. Palët kanë debatuar mes tyre.
Pas pak çastesh shtetasi Gentian Mithi dyshohet se ka shkuar në afërsi të banesës së 24 vjeçarit në lagjen “Salo Halili” në vendin e njohur si “Çinari i Tophanës” dhe aty mendohet se e ka plagosur me armë zjarri pistoletë dhe më pas është larguar në drejtim të paditur.
Policia po punon për kapjen e autorit si dhe zbardhjen e plotë të rrethanave të ngjarjes.
