Edhe pse në një retorikë më të butë, presidenti i PL-së Ilir Meta nuk i ka kursyer akuzat ndaj kreut të SPAK, Altin Dumani.
I ftuar në A2CNN, Meta tha se Dumani nuk është drejtuesi i SPAK-ut, por një kancelar që përcjell shkresat për llogari të Edi Ramës.
Po ashtu ai ngriti pyetjen për aferën e Inceneratorëve: “A është thirrur ndonjëherë Edi Rama nga SPAK-u?”.
“Altin Dumani nuk është drejtuesi por fatkeqësisht kancelari i SPAK-ut, që thjesht përcjell shkresat për llogari të Edi Ramës. A është thirrur ndonjëherë Edi Rama nga SPAK-u? Edi Rama përgjegjësi kryesor për aferën e inceneratorëve nuk është thirrur asnjëherë nga SPAK. Erion Veliaj duhet të ishte arrestuar para 4 vitesh. Kjo tregon çdo gjë”, deklaroi Meta.
Ndërsa sa i përket pyetjes nëse është thirrur në SPAK për dosjen eCEZ-DIA. Meta nuk dha një përgjigje të drejtpërdrejtë.
“Unë kam qenë në SPAK shumë seriozisht, për një çështje qesharake. Edhe për Cez DIA nuk kam asnjë lidhje unë, jo ka qenë në 2019 kur kam qenë në kulmin e presioneve që të shkelja Kushtetutën. Unë atje jam thirrur për qejfin e Edi Ramës, por kam shkuar për të respektuar”, tha Meta.
