Këshilltari për çështjet ekonomike në Partinë demokratike, Dorian Teliti, ka komentuar sondazhin e publikuar së fundmi nga Monitor mbi cilësinë e jetesës në kryeqytet.
Në raport thuhet se cilësia e jetesës në Tiranë po dëmtohet gjithnjë e më shumë për shkak të ndërtimeve pa kriter, trafikut të rënduar, mungesës së hapsirave publike ndotjes akustike dhe një sërë faktorësh të ngjashëm si këto.
Bazuar në faktorët e larpërmendur Teliti shkruan se ky është realiteti i jetesës në Tiranës, që dallon nga cilësia e videove me regji në rrjete sociale. Ai shton se ky realitet nuk është i dukshëm për politikanët dhe oligarkët pasi jetojnë në vilat e periferisë, dhe janë qytetarët e thjeshtë ata që vuajnë pasojat.
Sipas tij, raporti është një arsye më shumë për t’ju bashkuar protestës së thirrur ditën e premte.
Postimi i plotë:
Politikanët dhe oligarkët jetojnë në vilat e periferisë, ndërkohë qytetarët e thjeshtë përballen cdo ditë me jetesën e vërtetë që ofron Kryeqyteti.
Të shumta janë problemet e Tiranës, nga më të ndryshmet. Të jetosh në Tiranë jo vetëm që nuk është e thjeshtë, por fatkeqësisht nuk është as cilësore.
Prestigjozja “Monitor” në sondazhin e saj rendit qartë e shkoqur se cfarë e dëmton cilësinë e jetesës në Tiranë, duke filluar që nga ndërtimet pa kriter e pa planifikim, trafiku i renduar, mungesa e parqeve e hapësirave publike, e deri te ndotja e ajrit dhe zhurmat.
Doni ta dini se kur do bëhet Tirana një qytet i jetueshem?
Vetëm atëherë kur politikanët e veshur me pushtet të jetojnë në pallatet shumëkatëshe e shumëhyreshe kapic e ngjitur me njëra tjetrën, e të thithin 24 orë ajrin e ndotur 18 herë më shumë se normat e lejuara të OBSH-së, e të vuajnë trafikun e rënduar e të numërojnë orët për të gjetur një vend të thjeshtë parkimi.
Vetëm atëherë ndoshta do ti thërrasin mendjes që cilësia e jetesës në Tiranë dallon nga cilësia e videove me regji në rrjetet sociale.
Tirana meriton më tepër. Arsye më shumë për të protestuar të premten ora 11.00
