Tensione që kanë degraduar deri në përplasje fizike janë regjistruar këtë të mërkurë mes deputetëve në Kuvendin grek. Protagonistë ishin ish-deputet tashmë i pavarur i spartanëve, Konstantinos Floros dhe deputeti i partisë Zgjidhja greke, Vasilis Grammenos.
Sipas mediave vendase, pas debateve në seancë, Vassilis Grammenos i tha deputetit të pavarur “Do të të q* nënën do të të çoj në burg me byzylykë” dhe Konstantinos Floro i është përgjigjur “ dil dhe më thuaj”.
Më pas të dy deputetët janë përballur, ku Konstantinos Floros ka kapur Vassilis Grammenos prej jake, duke e goditur me grusht dhe duke e hedhur poshtë.
Pas ngjarjes, deputeti Grammenos është dërguar në klinikën e Kuvendit ku i është dhënë ndihma e parë.
Pas këtij episodi, kryetari i Kuvendit, Konstantinos Tasoulas, bëri të ditur se do t’i kërkonte rojeve të Kuvendit përjashtimin e Konstantinos Floros nga parlamenti për 15 ditë, dënimi maksimal i parashikuar nga rregullorja e Kuvendit.
