Të tjera detaje dalin në dritë nga ngjarja që u regjistrua rreth një muaj më parë, ku djali i ish-deputetit Tom Doshi, James Doshi përplasi me makinë një çift bashkëshortësh.
Ngjarja ndodhi në superstradën Lezhë-Laç, dhe nga hetimet ka rezultuar se djali i Doshit ka qenë fajtor, por është favorizuar nga policia, e cila nuk ka kryer veprimet konform ligjit, duke e lejuar që të marrë automjetin dhe të largohet.
Lidhur me ngjarjen u pezullua nga detyra një ditë më parë shefi i qarkullimit në Lezhë, Ismet Sula, ndërsa ditën e sotme është marrë në pyetje nga Prokuroria Drejtori i Policisë Vendore të Lezhës, Alfred Elezi.
Organi i akuzës ka ngritur dyshime se Elezi ka ndërhyrë përmes një telefonate te shefi i qarkullimit Ismet Sula, për të favorizuar djalin e Doshit, por kjo pritet të vërtetohet ose të hidhet poshtë edhe pas ekzaminimeve të tabulateve telefonike.
Ndërkohë, burime bëjnë me dije se me vendim të prokurorit është vënë në sekuestro makina tip “Lexus” e James Doshit, me të cilin shkaktoi aksidentin.
