Shkelje flagrante të Kushtetutës. Kështu e ka konsideruar Partia Demokratike vendimin e kryeministrit Edi Rama për të refuzuar interpelancën në Kuvend të kërkuar nga kreu i grupit parlamentar të PD-së, Gazment Bardhi pas publikimit të dokumenteve që implikojnë Olsi Ramën, vëllain e kreut të qeverisë në laboratorin e kokainës së Xibrakës.
Sipas Partisë Demokratike, neni 80 sanksionon se “Kryeministri dhe çdo anëtar tjetër i Këshillit të Ministrave është i detyruar t’u përgjigjet interpelancave dhe pyetjeve të deputetëve brenda 3 javëve”.
Ndërkohë antikushtetuese dhe të paprecedente e kanë konsideruar edhe deklaratën e kreut të grupit parlamentar të PS-së, Bledi Çuçi, për të refuzuar mocionin për zhvillimin e debatit parlamentar mbi problematikën e prodhimit, shitjes dhe trafikimit të lëndëve narkotike në vendin tonë, të propozuar po ashtu nga Bardhi.
Partia Demokratike dënon me forcën më të madhe vazhdimin e mohimit të të drejtave kushtetuese të deputetëve të opozitës nga Edi Rama dhe suita e tij dhe deklaron se nuk do pajtohet kurrë me këto akte antikushtetuse. Deklarata është shpërndarë në rrjetet sociale dhe nga kreu i PD-së, Sali Berisha.
Deklaratë e Partisë Demokratike:
Edi Rama në shkelje flagrante të Kushtetutës, refuzon të paraqitet në interpelancën e thirrur nga Kryetari i Grupit Paralamente të PD, Gazmend Bardhi, për rolin e dokumentuar të Olsi Ramës, vëllait të Edi Ramës në grupin shqiptaro-kolumbian të kokainës që kishte instaluar në fshatin Xibrakë në magazina shtetërore, fabrikën më të madhe të kokainës në Ballkan.
Rikujtojmë këtu se neni 80 sanksionin: ‘Kryeministri dhe çdo anëtar tjetër i Këshillit të Ministrave është i detyruar t’u përgjigjet interpelancave dhe pyetjeve të deputetëve brenda 3 javëve”.
Përveç kësaj dje në një akt antikushtetues të pa precedent dhe në kundërshtim të hapur me nenet 98-99 të regullores së Kuvendit, Kryetari i Grupit Parlamentar të Partisë Socialiste, Bledi Çuçi deklaroi në Kryesinë e Kuvendit se nuk do pranojë kërkesën mocion me debat për kryeministrin Rama të paraqitur nga Kryetari i Grupit Parlamentar të PD.
Partia Demokratike dënon me forcën më të madhe vazhdimin e mohimit të të drejtave kushtetuese të deputetëve të opozitës nga Edi Rama dhe suita e tij dhe deklaron se ajo nuk do pajtohet kurrë me këto akte antikushtetuse me të cilat Edi Rama kërkon të mbulojë lidhjet direkte të vëllait të tij me trafikun ndërkombëtar të kokainës dhe të mbrojë kësisoj veprimtarinë familjare mafioze të klanit Rama.
