Deputeti i PD-së, Lulzim Basha ka reaguar pas qëndrimit që mbajti sot kryebashkiaku Erion Veliaj, në lidhje me arrrestimet për korrupsion të drejtorëve të tij, ku u mundua të shfajësonte veten dhe i përcolli mesazh shefit të tij, Edi Ramës, ku deklaroi se ai nuk ka përgjegjësi për drejtorët siç kryeministri nuk mbajti përgjegjësi për zëvëndësin e tij, Arben Ahmetajn dhe i kujtoi shprehjen e “dardhave pas kurrizit”.
Në një postim në rrjetet sociale, Basha shkruan se Rama dhe Veliaj janë bërë si kartelet e mafias, që dalin e kërcënojnë njëri-tjetrin nga frika se po u vjen radha.
Basha e etiketon Ramën si koka e peshkut të qelbur, ndërsa Veliajn si koka e cironkës po aq të qelbur sa peshku. Sipas tij, Rama dhe Veliaj së bashku me patericat e tyre synojnë t’i bëjnë presion dhe kërcënojnë SPAK-un.
“Janë bërë si kartelet e mafias, që dalin e kërcënojnë njëri-tjetrin nga frika se po u vjen radha. Fillimisht dilte koka e peshkut të qelbur. Tani del koka e cironkës po aq të qelbur sa peshku. E në fund së bashku me patericat e tyre synojnë t’i bëjnë presion dhe kërcënojnë SPAK-un. Fundi i pandëshkueshmërisë është dita e parë e demokracisë së vërtetë për shqiptarët. Prandaj, sot është jetike të ndalen duart e pista që, në pazare me njëri-tjetrin, kërkojnë të vënë nën kontroll SPAK-un.” – shkruan Basha.
