Kryeministri Edi Rama refuzoi interpelancën e kërkuar me urgjencë nga kreu i grupit parlamentar të PD-së, Gazment Bardhi, pasi publikoi dokuemntet që sipas tij implikonin vëllain e kreut të Qevesrisë, Olsi Ramën, në laboratorin e kokainës së Xibrakës.
Të njëjtin qëndrim si Rama, mbajti edhe kryeparlamentar Lindita Nikolla, në Konferencën e Kryetarëve që në shkelje të ligjit refuzoi ta fuste interpelancën parlamentare në rendin e ditës, një mekanizëm që rregullorja e Kuvendit parashikon për llogaridhënien e qeverisë.
Socialistët duket se janë vënë të gjithë në mbrojtje të vëllait të kryeministrit, dhe i sulen kujtdo që i përmend emrin. Duket se edhe kryetarja e Kuvendit, Lindita Nikolla ka marrë urdhër nga kreu i qeverisë pçr t’i mbyllur mikrofonin çdo deputeti që përmend akuzat në fjalë.
Të njëjtën gjë Nikolla bëri edhe me Bardhin, kur ky i fundit po i kërkonte llogari pse nuk e kishte futur interpelancën në rendin e ditës. Nikolla iu drejtua Bardhit me të njëjtat fjalë si të kryeministrit Edi Rama se duhet të presë SPAK-un dhe të kuptojë nëse ka shpifur.
Në sulm u hodh edhe kreu i grupit parlamentar të PS-së, Bledi Çuçi në mbrojtje të Olsi Ramës, ku sipas tij, Kuvendi nuk është studio e Blendi Fevziut.
Bardhi: Unë nuk e di ca quani ju veprimtari shtetërore por për mua trafiku ndërkombëtar i drogës është çështje prioriteti kombëtar. Veprimtaria e institucioneve të shërbimeve sekrete në raport me trafikun ndërkombëtar të drogës është çështje e veprimtarisë shtetërore. E kuptoj që trafiku ndërkombëtar i drogës për Edi Ramën është çështje private. Se nëse familjar të tu janë të përfshirë në trafik droge, pa dyshim që luftën ndaj trafikut të drogës nuk e konsideron veprimtari shtetërore.
Nikolla: Ju ndërpres fjalën. Lironi foltoren zoti Bardhi.
Nikolla: Nuk na tremb, prit me qetësi vendimin e organeve të drejtësisë. Do e marrësh përgjigjen atje nëse ke shpifur apo jo. Tani na lë të vazhdojmë.
Bardhi: Duhet të vijë ai, të mos fshihet pas teje. Frikacakë. Të vijë ai të japë llogari.
Nikolla: Nuk e vendos ti, por rregullorja e Kuvendit.
Çuçi: Ju lutem fillojmë seancën. Për procedurë merret vetëm një herë fjala. Këtu nuk jemi Pazar, as studio e Fevziut, e as SPAK-u. Këtu jemi në Kuvend. Duhet të funksionojmë sipas rregullores, e ka të qartë flitet vetëm njëherë për procedurë dhe vazhdojmë seancë normale.
Kryeparlamentarja Lindita Nikolla të njëjtin veprim e bëri më herët edhe me deputeten demokrate, Albana Vokshi, të cilës i mbylli mikrofonin sapo ajo përmendi akuzat ndaj Olsi Ramës, vëllait të kryeministrit Edi Rama, që implikohet në laboratorin e kokainës në Xibrakë.
Vokshi: Sot duhej të futej si pikë e parë e rendit të ditës, interpelanca urgjente me Kryeministrin se është e një interesi madhor për publikun. Por hartuesit e rregullores nuk e kanë lënë në vullnetin tuaj, në dëshirën e mazhorancës për të bërë një interpelancë urgjente apo jo, por fatmirësisht ka shpëtuar edhe ndryshimeve të njëanshme, sepse u vërsulët ta ndryshonit rregulloren para disa javësh për të dënuar deputetët, dy javë, tre javë, dy muaj. Shyqyr që nuk i keni prekur disa nene të rregullores. Ajo e detyron kryeministrin, nuk ia le atij në dëshirë të vijë apo të mos vijë. Po si qenka “çështje personale” nëse vëllai i Kryeministrit përdor të njëjtin automjet, të njëjtën makinë sikurse organizata kriminale?!
Nikolla: Të lutem, dakord, doli thelbi i kërkesës suaj …
Vokshi: E kam për procedurë, mos ndërhyni ju lutem. Pse nuk vjen kryeministri?! Çfarë frike ka? Ka një hall të madh, apo jo?! Apo vëllai i Kryeministrit punonte për hesap të Kryeministrit?! Po si qenka “çështje private”, narkotrafiku me Amerikën Latine në Shqipëri dhe në Gjermani?!”
Ndërkohë, vlen të theksohet fakti se në tavolinat e gjjithë deputetëve të opozitës, është vendosur e printuar targa “AA653DM”. Më 28 mars, Bardhi deklaroi përmes një konference se vëllai i Ramës kishte përdorur makinën me targa AA 653DM për të hyrë dhe dalë jashtë vendit – makinë e përdorur edhe nga tre të dënuar për dosjen “Xibraka”.
Dokumentet e TIMS të vëna në dispozicion nga Bardhi tregojnë se Olsi Rama ka hyrë në territorin e Shqipërisë tre herë me këtë makinë në qershor, korrik dhe gusht të vitit 2014.
E njëjta makinë është përdorur disa herë nga Gentian Gjonaj nga prilli deri në nëntor të vitit 2014 dhe nga Ermal Hoxha, nipi i ish-diktatorit Enver Hoxha, në nëntor 2014.
Sipas Bardhit, prokuroria dhe gjykata shqiptare kanë pranuar se personat e dënuar nuk janë të vetmit persona që kanë qenë të përfshirë në këtë veprimtari kriminale, por një hetim për personat e paidentifikuar është mbyllur më tej.
Në mars të vitit 2016, Prokuroria e Krimeve të Rënda e ka ndarë më vete procedimin për bashkëpunëtorët e paidentifikuar, dosje e cila është pezulluar më pas.
