Deputeti i Partisë Demokratike, Luan Baçi, ka folur gjatë takimit me demokratët në Fier, mbi aksionin opozitar që sipas tij ishte shumë i suksesshëm, ndërsa i konsideroi të qenësishme ndryshimet në PD, qoftë në Këshillin Kombëtar ashtu edhe në Kryesinë.
“Ne jemi bashkuar në një aksion opozitar, në një opozitë shumë të fuqishme.
Ne deputetët u bashkuam, bëmë atë që thanë demokratët, bëmë atë që e kërkuan strukturat, nuk bëmë asnjë heroizëm, sikundër shpesh përpiqen ta konsiderojnë.
Ne duhet ti kërkojmë ndjesë demokratëve që ky bashkimi i deputetëve erdhi me vonesë, pasi në bazë, bashkimi ishte i dukshëm”, tha Baçi.
Baçi e konsideroi të paligjshëm dhe abuziv ndalimin që i bëhet sot liderit të opozitës, Sali Berisha.
“Çdo mbledhje, çdo komisioni, çdo takim me ndërkombëtarët, qytetarët dhe grupet e interesit, duhet të fillojë me fjalët: lironi liderin e opozitës, kryetarin e PD-së, Sali Berishën.
Kjo duhet të jetë motoja jonë”, tha Baçi.
Baçi tha se në këtë vend nuk ka normalitet përsa kohë një gjyqësor i kontrolluar nga Kryeministri, nuk lejon liderin e opozitës të marrë pjesë në Kuvend.
“Ne nuk kemi bërë paqe me mazhorancën, jemi në luftë me këta rilindas të korruptuar dhe paqja do të vendoset kur të largohen nga pushteti këta.
Ata janë sjellë me ne sikur jemi armiq dhe ne të tillë do I konsiderojmë”, tha Baçi.
