Një aksident tragjik është regjistruar këtë të mërkurë në Gjermani, ku një autobus ka dalë nga rruga në autostradën A9 pranë Lajpcigut.
Si pasojë e aksidentit kanë humbur jetën të paktën pesë persona dhe rreth 20 të tjerë kanë mbetur të plagosur.
Autobusi Flixbus, i cili po udhëtonte midis Wiedemar dhe Schkeuditzer Kreuz në drejtim të Mynihut, doli nga rruga për arsye ende të paqarta, duke u përplasur me disa pemë. Në bordin e mjetit ndodheshin 53 pasagjerë dhe dy shoferë.
“Nuk dihen ende rrethanat e sakta të aksidentit. Ne po punojmë ngushtë me autoritetet lokale dhe ekipet e shpëtimit në vendngjarje dhe do të bëjmë gjithçka që është e mundur, për të sqaruar shpejt dhe plotësisht shkakun e aksidentit”, njoftoi dega gjermane e Flix, pas aksidentit të rëndë.
Në një deklaratë, Flix konfirmoi se një autobus në distanca të gjata që udhëtonte në emër të FlixBus u përfshi në një aksident në rrugën nga Berlini në Zyrih.
“Siguria e pasagjerëve dhe shoferëve është gjithmonë përparësia kryesore. Mendimet tona janë me të gjithë ata që janë prekur nga ky aksident dhe familjet e tyre. Ne do të ndajmë informacione të mëtejshme kur të bëhet e mundur.” – thuhej në reagim.
