Nga Boldnews.al
Zgjedhjet e vitit 2023 ishin më të shtrenjtat të zhvilluara ndonjëherë në Shqipëri. Shkak u bë teknologjia, që nga identifikimi i letërnjoftimeve, votimi elektronik në disa bashki, pajisjet e shenjave të gishtave apo edhe lidhja me internet e të gjitha qendrave të numërimit.
Megjithëse u shpenzuan miliona euro, sërish pati probleme madhore, teksa identifikimi dhe votimi u bënë në mënyrën e vjetër, atë të regjistrave fizike me laps e letër. Mësohet se fatura e zgjedhjeve shkoi në plot 27 milionë euro, shumë herë më i lartë sesa i zgjedhjeve të mëparshme.
Vetëm votimi elektronik në 3 bashki kushtoi 6 milionë euro, ndërkohë 3 milionë shkuan për pajisjet e identifikimit elektronik, 1.2 milionë euro për transmetimin e të dhënave. Ndërkohë, pjesa tjetër shkoi për logjistikë, kuti, fletë votimi, bojë timbruese apo materiale kancelarie. Por, ku shkuan këto fletë votimi?
Sipas dokumenteve që disponon redaksia e BoldNews.al, Komisioni Qendror Zgjedhor ka hapur tenderin për shitjen e fletëve të votimit. Mësohet se data e zhvillimit të këtij ankandi do të jetë në datën 11 prill në orën 11:00, teksa objekti i procedurës së hapur është “shitje letër (fletë votimi) në sasinë e parashikuar 63,112.22 kg me qëllim asgjësimin e të dhënave nëpërmjet riciklimit/përpunimit”.
Njoftimi vijon më tej se vlera fillestare e këtij ankandi është 347.117 lekë pa TVSH, ose me TVSH shuma shkon në rreth 4 mijë euro. Një shumë relativisht shumë e ulët, por duket se vetëm kaq vlejnë këto fletë në realitet. As milionat e shpenzuara nuk e justifikojnë dështimin e organizimit të zgjedhjeve, osë më saktë atë të zhvillimit të tenderëve pa asnjë garë.
Redaksia e BoldNews.al ka raportuar në vijimësi për tenderët e Celibashit, teksa ai ka prokuruar vetëm për zgjedhjet e kaluara plot 15 milionë euro me procedurën “me negocim pa shpallje”.
Mësohet se ishin rreth 14 tendera me një faturë prej 1.5 miliardë lekë, të cilat KQZ i prokuroi me negocim të drejtëpërdrejtë. Përfituesi më i madh i kontratave ishte kompania hollandeze Smartmatic International. Përveç saj, përfitues ishte edhe firma vendase “R & T”, që mori miliona euro me negocim të drejtëpërdrejtë nga KQZ. Ndërkohë, para’ ka marrë edhe kompania “Farma Net Albania”.
