“Nuk ka rilindas që nuk vjedh, por Jorgo Goro është kurbani i Olta Xhaçkës”
Kështu shprehet kreu i PD-së, Sali Berisha në lidhje me arrestimin e kryebashkiakut të Himarës, i cili akuzohet se nëpërmjet dokumenteve të falsifikuara ka mundësuar kalimin e sipërfaqeve të konsiderueshme tokë shtet, në favor të privatëve, pasuri që aktualisht janë në zotërim të një shoqërie të zotëruar nga Artan Gaçi, bashkëshorti i ish-ministres Olta Xhaçka, i cili ka fituar statusin e investitorit strategjik.
Gjatë fjalës në protestën e sotme, Berisha u shpreh se kryeministri Edi Rama e mban Olta Xhaçkën në Kuvend, pasi është aksioner në investimin stratetegjik të burrit të saj dhe asaj. Sipas tij, kreu i qeverisë përdor drejtësinë tërësisht në interesat e tij personale.
Berisha tha se për shkak të qëndrimeve ç’njerëzore, antikushtetuese, antieuropiane të Ramës, ngre një valë të pafavorshme për emigrantët tanë në Greqi.
Berisha: Sot Edi Rama urdhëroi burgosjen e Jorgo Goros. Ju them unë, nuk ka rilindas që nuk vjedh, por Jorgo Goro është kurbani i Olta Xhaçkës, sepse Goro nuk bëri gjë tjetër veç se regjistroi tokën e falsifikuar të investitorit strategjik burrë i Olta Xhaçkës. Edi Rama, Oltën e mban në parlament. Natyrisht është aksioner në investimin stratetegjik të burrit të saj dhe asaj. Dhe për këtë na bind duke arrestuar Goron se ka regjistruar pronat e saj. Të dashur miq! Edi Rama përdor drejtësinë tërësisht në interesat e tij personale, shkatërron marrëdhëniet me një vend fqinj në të cilin jetojnë rreth 1 mln shqiptarë, të integruar që kanë ndërtuar jetën dhe ëndërrën e tyre. Tani për shkak të qëndrimeve të tij ç’njerëzore, antikushtetuese, antieuropiane ngre një valë të pafavorshme për emigrantët tanë. Miqtë e mi! Edhe njëherë ju theksoj, çështja Beleri është para së gjithash çështje e shqiptarëve, sepse këtu nuk respektohen parimet universale të të drejtave të njeriut. Sepse këtu respektohet prezumimi i pafajësisë. Sepse këtu respektohet manipulimi i fakteve, sepse këtu dënohet vetëm e vetëm për të mbuluar krimet monstruoze dhe mafioze, që Edi Rama dhe klani i tij ka kryer në tokat e himariotëve, duke shitur brigjet e detit.
