Deputetja e PD-së, Albana Vokshi ka ngritur shqetësimin edhe nga foltorja e Kuvendit për situatën në Urgjencën e Qendrës Spitalore “Nënë Tereza”, e cila është jashtë funksionit që pas zjarrit të rënë në katin e parë në orët e para të mëngjesit të 11 shkurtit.
Gjatë fjalës së saj, Vokshi u shpreh se po rrezikohet jeta e qytetarëve në nevojë të cilëve i vonohet shërbimi në 2 urgjencat e tjera, të Traumës dhe Sanatoriumit, të mbytura nga fluksi i pacientëve pas zjarrit në QSUT.
Ajo tha më tej se Prokuroria e Tiranës u vu në lëvizje vetëm pas denoncimit të një mjeku, teksa akuzoi qeveritarët për korrupsion në lidhje me tenderin për rikonstruksionin e QSUT-së. Sipas saj, aty ka rënë dy herë zjarr dhe kjo gjë po mbahet e fshehtë.
“Pse heshtin, pse nuk flitet, vetëm publikimi I mesazhit të një mjeku dixhital vuri në lëvizje prokurorinë të fillonte hetimet, sepse askush nuk lëvizte, çfarë fshehin, kanë vjedhur dhe kanë vjedhur pa lezet. Kërkova kontroll parlamentar në QSUT dhe refuzuan të shkonin Mjeku dixhital thotë se në katet nëntokë të sëmundjeve të brendshme janë djegur çdo gjë, nuk ka rënë vetëm një herë zjarr ka rënë dy herë dhe kjo mbahet e fshehtë. Shkojnë pacientët në QSUT nuk marrin shërbim, i çojnë në spitale të tjera duke i vonuar? Po pse quhet urgjencë, se duhet shpejt. Kostoja: Rrezikim i jetës së qytetarëve”- tha Vokshi.
Kujtojmë se për zjarrin në urgjencën e QSUT, është nisur një hetim nga Prokuroria e Tiranës, e cila ka regjistruar procedimin penal për veprën penale “Shkatërrimi pronës me zjarr”.
Nga ana e prokurorisë është urdhëruar administrimi i të gjitha provave për të dokumentuar shkakun dhe vlerën e dëmit të shkaktuar, si dhe personat përgjegjës për shkaktimin e dëmit. Me administrimin e akteve proceduriale dhe akteve të ekspertimit do të konkludohet mbi shkakun e rënies së zjarrit dhe vatrës fillestare.
Vlen të thekohet fakti se në muajin Mars të vitit 2023, kryeministri Edi Rama dhe ish-ministrja e Shëndetësisë, Ogerta Manastirliu inaguruan investimin 17 milion euro të rikonstruksionit të QSUT-së, që siç duket miliona euro janë bërë tym dhe hi. Më herët është raportuar se për shkak të zjarrit tek QSUT, shërbimet jetike mjekësore ende nuk janë futur në funksion, teksa spitali është futur në kolaps.
