Edhe pse ka gjysmën e ministrave dhe kryebashkiakëve ose nën hetim ose në burg, kryeministri Edi Rama vazhdon të këmbëngulë se nuk ka pse të mbajë asnjë përgjegjësi.
I ftuar në emisionin “Opinion”, Rama vazhdoi me teorinë se vartësit e tij, !”i hanë kumbulla dhe dardha pas shpine”. Sipas tij, kush kërkon të kapë ndonjë gjë, të shkojë para drejtësisë si “çeçua”.
“Kam vetëm një përgjegjësi, që është përgjegjësia e udhëheqjes së këtij vendi për të dalë njëherë e mirë pa kthim nga një histori e dhimbshme dhe për të ardhur në këtë drejtim. Çfarë kemi nisur duke i dhënë jetë SPAK-ut të mos ndalet dhe kam përgjegjësi për faktin që më në fund njerëzit që më kanë votuar mua të shikojnë që këtu s’ka të paprekshëm që kush ndan qëllimet e përbashkëta është i nderuar, kush do të bëjë një rrugë e dy punë që të kapi ndonjë gjë, të shkojë atje ku ka vendin. Për këtë e kemi bërë SPAK-un. U desh PS dhe unë në krye të saj bashkë me njerëzit e tjerë që në Shiqpëri të ketë figura të larta politike të lidhura me pushtetin ose jo që shkojnë përpara drejtësisë si çeçua. Ne do mbështesim vendosmërisht SPAK-un me çfarëdolloj çmimi. PS ka 100 mijë vetë dhe një ish-ministër, një ish-ministër tjetër që shkojnë përpara drejtësisë është pjesë e këtij misioni që drejtësia të merret me ta, nuk merrem unë. Ju të elitës shqiptare keni një problem. Tjetër thoni, tjetër mendoni, dhe ndërkohë keni perceptimin që politikanët janë të gjithë njësoj”, deklaroi Kryeministri Edi Rama.
Në lidhje me akuzat e ish-zv.kryeministrit Arben Ahmetaj, Rama tha se nuk bën komente për çështjet e djrejtësisë, e aq më tepër për një person që është në kërkim.
“Unë nuk të iki nga pyetja nëse me jep mundësi për t’u përgjigjur. Unë nuk bëj komente për të gjitha çështjet e drejtësisë, imagjinoni të bëj komente për një njeri që është në kërkim nga drejtësia. Çfarë komenti kërkoni të bëj për një njeri që është në kërkim nga drejtësia? Ore nuk është. Që në kohën e romakëve është ndarë kjo punë. Është një njeri i kërkuar nga drejtësia. Nëse ke interesa të dish në lidhje me trajtimin e temës. Një njeriu në kërkim nga drejtësia nuk i përgjigjem. Fakti që një njeri është në kërkim flet më shumë.” – tha Rama.
