Trajneri i Partizanit, Orges Shehi, foli për MCN TV, pas humbjes minimale ndaj Teutës.
Shehi deklaroi se kundërshtari ishte shumë agresiv, ndërsa sqaroi edhe ndryshimet në formacion.
“Si në të kaluarën, humbasin nga një goditje standarde. Kundërshtari është agresiv në kufij të limiteve, terreni nuk të lë. Nuk ishim cinik duke fituar topa të dytë. Kundërshtari i fitoi dhe mori fitoren. Nëse nuk fiton duelet, është e vështirë. Kundërshtari ishte shumë agresiv. Duhet të dilnim nga presioni shpejt. Ishim vonë në komandë për të dalë përpara. Mba dhe Cara ishin të vetëm, nuk dolëm rrjedhshëm. Loja efektive ishte e pakët. Preka ishte me të kuqe dhe ndaj futa Mikulic, është edhe i gjatë, për të mbuluar Gjinin në goditje standarde. Vila luajti edhe javën e fundit. Skuka dhe Keko nuk janë në gjendje optimale, duan kohën e tyre edhe pak. Rrapaj e donim në fushë edhe pse ishte në gjendje jo të mirë shëndetësore”, tha ai.
Ndërsa trajneri i Teutës, Edi Martini, e cilësoi suksesin e sotëm një triumf shumë të rëndësishëm, ndërsa shtoi se nuk shikon dallime mes dy ekipeve.
“Ishte shumë e rëndësishme si fitore, sidomos pas eliminimit në Kupë. Jemi stërvitur mirë, Partizanin e kishim vlerësuar maksimalisht. Kjo fitore është shumë e rëndësishme. Nuk dua të them që mendojmë për lart, jemi me këmbë në tokë. Kemi ndeshjen e radhës me Tiranën, pastaj me Dinamon. Mund të fitonim me Partizanin në ndeshjen e parë, hap pas hapi me djemtë të ecim e të bëjmë gjithçka për të arritur sa më mirë në fund. Edhe kur humbisja thoja që e tentojmë katërshen, jo më tani. Nuk dua t’i vë në presion djemtë, e mbaj për vete. Ata të luajnë qetë në fushë dhe pretendimet rriten. Sot bëmë detyrën pasi nuk shoh asnjë dallim nga Teuta ime dhe Partizani”, tha Martini.
