Kryetari i PD, Sali Berisha, akuzoi këtë të shtunë Edi Ramën se ka urdhëruar mediat që të censurojnë fjalën e pjesëmarrësve në tubimin e përnatshëm qytetar poshtë banesës së tij. Berisha ftoi çdo qytetar shqiptar të mendojë se kjo betejë është për secilin prej tyre.
Gjatë fjalës së mbajtur, e vuri theksin në investimet e bëra gjatë qeverisjes së PD. Berisha tha se gjatë kohës së qeverisjes së tij, taksat e shqiptarëve u përdorën për të ndërtuar dhe rikonstruktuar spitalet në të gjithë Shqipërinë.
Kryedemokrati deklaroi se gjatë qeverisjes së tij, pagat e mjekëve dhe infermierëve u rritën me 150%, ndërsa shtoi se sot ata po largohen nga vendi.
Kryetari i Partisë Demokratike tha se Covid vrau në Shqipëri 20 mijë persona dhe ne u treguam në raport me shërbimin shëndetësor jo vend i botës së tretë, por vend i botës së katërt apo të pestë. Berisha tha se sot, spitalet mbyllen njëri pas tjetrit dhe se specialistët mungojnë edhe në spitalet rajonale shumë të rëndësishme.
Ai deklaroi se prokurorët e SPAK se nuk e po akuzojnë Ilir Beqajn për korrupsion siç sipas tij, e meriton, por veç për shpërdorim detyre. Berisha tha se, ish-ministri i Edi Ramës hyn dhe del në SPAK, si të ishte në selinë e PS-së.
Kryetari i Partisë Demokratike u shpreh se kompania e sterilizimit është e Edi Ramës dhe se Dumanit ia mbyllën gojën dhe u tërhoq nga mendimi veçmas.
“Nuk ishte Beqja që dilte nga një studio në studio tjetër më gërshërën e bishtthyer dhe pincën me një krah. Ishte Rama qytetarë që paraqitej para jush, dhe ju thoshte se me çfarë jeni operuar gjer më sot. Një çfarë të thuash. Se gërshëra me një krah nuk pret, se pinca me një krah nuk mban. Dhe Edi Rama e bënte këtë vetëm e vetëm se sipërmarrja, vjedhja e dytë e shekullit ishte e tij. Ishte ai hajduti kryesor i saj. Kurse SKAP-i partisë, Duman-Kraja e të tjerë, e dërgoi për shpërdorim detyre”, tha Berisha.
“Po pse e bëjnë këtë? Sepse Dumani, pasi bëri një mendim veças në padinë e parë, që nuk u bë asnjë padi ndaj Beqës, u tërhoq, ia mbyllën gojën. Po si ia mbyllën gojën? Hë i thanë ata, po ti pse nuk çon Erion Veliajn, që ka vjedhur dyfishin me inceneratorët? Ka firmën në të gjithë procedurën, është përgjegjës direkt me Belinda Ballukun për kontrollin e ndërtimeve, dhe sot pas 6 viteve nuk ekziston gjurmë e tyre. Kështu që, ata pra e gjuajnë me krime në surrat njëri-tjetrin dhe bëjnë amnistinë e kriminelëve qeveritarë”, shtoi.
Fjalimin e mbylli duke shprehur bindjen se opozita shqiptare do vijë në pushtet.
“Unë u them shqiptarëve se të krahasosh pushtetin e viteve të saj, me pushtetin e rilindjes së Edi Ramës është një gabim i rëndë, çmimin e të cilit e paguan çdo qytetar që e paguan atë. Ndaj dhe ne jemi këtu misionarë të të vërtetës, për të ndriçuar mendjen dhe zemrat të shqiptarëve me të vërtetat e pamohueshme. E vërteta do na bëjë të lirë. E vërteta do na bëjë të lirë. E vërteta do na çdo drejt fitores”, përfundoi Berisha.
