I dërguari special i Shteteve të Bashkuara të Amerikës, Gabriel Escobar, në një konferencë të përbashkët me presidenten e Kosovës Vjosa Osmani, tha se janë të shqetësuar për sulmin e Banjskës më 24 shtator të vitit të kaluar, ku mbeti i vrarë efektivi Afrim Bunjaku.
Escobar i bëri thirrje Serbisë që autorët e sulmit në Banjskë të dalin para drejtësisë.
“Në takimin tonë patëm një bisedë të sinqertë lidhur edhe gjendjen e sigurisë jemi tepër të shqetësuar për ngjarjen e 24 shtatorit, e ftojmë Serbinë që gjithë ata që janë përgjegjës të dalin prej drejtësisë dhe të japin llogari të plotë për atë sulm”, ka thënë Escobar.
Gjithashtu ai u ndal te dhe te vendimi i Bankës Qendrore të Kosovës për dinarin, duke e konsideruar si sfidë. Mes tjerash theksoi se palët duhet të ecin përpara sa i përket dialogut si dhe marrëveshja e Ohrit të bëhet realitet.
“Duhet të gjejmë mënyra se si mund të ecim përpara në dialog që përfshin Asociacionin por jo vetëm atë, edhe siç përmendi presidentja dy palët duhet të vazhdojnë me zbatimin e plotë, duke pasur një marrëveshje historike por edhe ne e ftojmë Serbinë që të vazhdojë të zbatojë. Marrëveshja e Ohrit të bëhet realitet.”– tha Escobar.
