Kryedemokrati Sali Berisha komentoi për herë të parë këtë të mërkurë dialogun mes opozitës dhe mazhorancës për rikthimin e normalitetit në parlament. Në fjalimin e mbajtur gjatë protestës së zhvilluar poshtë banesës së tij, kryetari i PD-së tha se paralajmëroi Edi Ramën se nuk do t’i shpëtojë kurrë përballjes me komisionet hetimore.
Kreu i opozitës shtoi se dialogu në parlament i ditëve të fundit, është bërë në mënyrë që të drejtat e opozitës të respektohen. Ai theksoi se opozita do nuk e braktisë kurrë parlamentin.
“Këto ditë në parlament është bërë dialog në mënyrë që të drejtat e opozitës të respektohen. Dua të sqaroj ju dhe çdo shqiptar se nuk është opozita ajo që ka shkelur të drejtat kushtetuese, as të vetat, as të kujt tjetër. Është Edi Rama, i cili nuk pranon të respektojë të drejtat kushtetuese. Në këto rrethana ai ka vetëm një qëllim dhe ky qëllim është që opozita të bojkotojë parlamentin. Sepse, duhet të jemi realistë, në mënyrë makabër ai fitoi më shumë se kushdo tjetër nga bojkoti i parlamentit nga opozita”, tha Berisha.
“Mirëpo unë i them sot Edi Ramës këtu para jush dhe në emër tuaj se opozita nuk braktis parlamentin, por opozita do bëjë çdo gjë për të drejtat e saj kushtetuese në parlament dhe kudo. Prandaj dhe Edi Rama, ti ke frikë dhe tmerr nga komisionet hetimore. Nuk ka forcë në botë që të shpëton prej tyre. Le të vijë kushdo në mbrojtje tënde, ti do përfundosh para atyre komisioneve sepse ke vjedhur këtë komb, këtë vend sa askush tjetër në histori”, shtoi ai.
Berisha deklaroi se Edi Rama e ka të qartë se pushteti i tij do të marrë fund. Ai i bëri apel kundërshtarit politik “që të mos provokojë shqiptarët, sepse qytetarët nuk do të ja falin”.
Berisha ripërsëriti thirrjen për qeveri teknike. “Le të bashkohemi ne në betejë pa kthim, në mosbindje civile në të katër anët e vendit për qeveri teknike, për zgjedhje të lira, për fitoren e opozitës dhe një Shqipëri normale, një Shqipëri të qytetarëve”, tha kryedemokrati.
Një ditë më parë, kreret e grupeve parlamentare të PS dhe PD, Bledi Çuçi dhe Gazment Bardhi arritën dakordësi në parim për ngritjen e 2 komisioneve hetimore (nga 8 që kërkohen nga PD), e në këmbim opozita do të heqë dorë nga kaosi në jetën parlamentare.
