Çështja e vrasjes së 4 qytetarëve në demontsratën e Partisë Socialiste më 21 Janar të vitit 2011 para Kryeministrisë, do të hetohet nga Prokuroria e Posaçme (SPAK).
Vendimi është marrë këtë të martë nga Kolegji i Gjykatës së Lartë me trupin gjykues Ilir Panda, Sokol Binaj dhe Sandër Simoni, pas kërkesës së rekursit të bërë nga Rajmonda Nika, e veja e të ndjerit Aleks Nika, një prej viktimave të “21 Janarit”.
Seanca e sotme është mbajtur dhe me praninë e palëve. Tashmë Gjykata e Lartë detyron SPAK-un të regjistrojë procedimin penal për “21 Janarin” dhe të hetojë kallëzimin penal të bërë nga Rajmonda Nika, ndaj Sali Berishës, Lulzim Bashës, Ndrea Prendit dhe Agim Llupos.
Gjatë seancës së sotme, përfaqësuesi i SPAK, Alfred Shehu tha se ishte ende momenti që dosja e 21 Janarit të merrej në shqyrtim prej saj. Prokurori Alfred Shehu tha se rekursi nuk duhet të pranohet, pasi një organ tjetër kompetent është duke vijuar hetimet për vrasjen e Aleks Nikës, për identifikimin e autorëve.
“Në këtë fazë të hetimit, kurrsesi nuk mund të aludohet për krim në formën e organizatës kriminale, por edhe për emra, subjekte të SPAK”, citohet të ketë thënë Shehu.
Debati mes prokurorit të SPAK dhe trupit gjykues:
Gjyqtari Ilir Panda: Ju keni kryer veprime verifikuese në lidhje me këtë kallëzim?
Prokurori Alfred Shehu: Është kërkuar vetëm një informacion nga arshiva, pasi me herët në SPAK ka qenë një kallëzim tjetër me të njëjtin objekt, por me palë të tjera.
Gjyqtari Sokol Binaj: Kush heton për zinxhirin drejtues të shtetit? Ka ndonjë stimul Strasburgu për juve? Funksionarë të lartë të shtetit të implikuar në këtë linjë. Ka detyrim për juve?
Prokurori Alfred Shehu: Deri tani nga hetimi i Prokurorisë Tiranë nuk është regjistruar ndonjë emër.
Gjyqtari Sokol Binaj: Edhe po t’u dalë nuk e regjistrojnë, sepse nuk e kanë në kompetencë.
Prokurori Alfred Shehu: Praktika është që regjistrohet, por pastaj kalon për kompetencë.
Kërkesa e familjes Nika përfundoi në Gjykatën e Lartë pasi GJKKO dhe Apeli i GJKKO e rrëzuan. Në rekursin e bashkëshortes së Aleks Nikës, thuhej se Prokuroria e Tiranës e ka mbajtur hetimin për 21 janarin për 2 vjet e 6 muaj pa bërë asnjë veprim për zbardhjen e ngjarjes. Prokuroria e Posaçme kishte shpallur moskompentencë, jo vetëm për padinë e familjarëve të depozituar më 16 shkurt të këtij viti, por edhe atë të bërë nga Ministria e Drejtësisë dhe Partia Socialiste.
Pas vendimit të Gjykatës së Lartë, Rajmonda Nika, e veja e Aleks Nikës u shpreh se e drejta gjithmonë fiton dhe se e prisnin këtë vendim, duke shtuar se ajo ka kallëzuar gjithë zinxhirin komandues të asaj kohë.
“E prisnim, sepse e drejta gjithmonë fiton. Shpresoj që të vazhdojë dhe të trajtohet ashtu sic e meriton. Kam kallëzuar gjithë zinxhirin, që nis nga Berisha e deri tek më i vogli,” tha ajo në një prononcim për mediat.
Ndërkohë, kujtojmë se pas sulmeve nga kryeministri Edi Rama për mungesë shtylle korrizore sa i përket hetimeve për “21 Janarin”, Prokuroria e Tiranës lëshoi një deklaratë për mediet më 22 janar, duke bërë me dije se kishte rinisur hetimet dhe kishte kërkuar ndihmë jashtë vendit, për zbardhjen e vrasjes së dy protestuesve më 21 janar, të mbetura pa autorë prej vitesh.
Vrasjet e Aleks Nikës dhe Hekuran Dedës dhe plagosja me armë zjarri e 6 personave të tjerë, gjatë protestës së Partisë Socialiste para kryeministrisë, ka mbetur pa autorë dhe prokuroria e pati pezulluar atë për vite me rradhë në kërkim të provave.
Po ashtu, prokuroria tha në atë kohë se kishte marrë parasysh edhe vendimin e Gjykatës Europiane të të Drejtave të Njeriut të nëntorit të vitit të kaluar, e cila ka kërkuar zbardhjen e ngjarjes dhe ka gjetur shtetin shqiptar fajtor për shkelje të së drejtës së jetës dhe asaj të hetimit.
Kujtojmë se në demonstratën e 21 Janarit të vitit 2011 u vranë Aleks Nika, Hekuran Deda, Ziver Veizi dhe Faik Myrtaj. Gjykata ka vlerësuar se vrasjet e Ziver Veizit dhe Faik Myrtajt kanë ndodhur nga pakujdesia dhe dënoi ish-komandantin e Gardës, Ndrea Prendi me një vit burg, si dhe gardistin Agim Llupo me 3 vite.
