Janë zbardhur detajet nga mbledhja e grupit parlamentar të Partisë Demokratike, ku fokusi kryesor janë negociatat e Gazment Bardhi me mazhorancën për të sjellë normalitetin në Kuvend, ku u ka prezantuar pikat kyçe të marrëveshjes dhe se deri në ç’fazë janë negociatat.
Burime brenda mbledhjes bëjnë me dije se deputeti Tritan Shehu ka deklaruar se duhet të vijojnë me aksionin në Kuvend dhe të mos pranojnë asgjë, pa kushtin e lirimit të liderit demokrat Sali Berisha nga masa e arrestit në shtëpi.
Por, pas kësaj kërkese, Shehu ka patur një debat verbal me deputetin Bledjon Nallbati i cili ka reaguar me tone të ashpra. Sipas tij, Tritan Shehu nuk ka marrë pjesë në aksionin parlamentar.
DEBATI
Tritan Shehu: Ne duhet të shpëtojmë Sali Berishën nga arresti dhe për këtë duhet të vazhdojmë aksionin opozitar. S’kanë farë rendësi këto që marrim (negociatat)
Nallbati: Shumë dakord me Tritanin. Të vazhdojmë aksionin, por me një kusht që ti të jesh në balle. (I referohet idesë që ata të cilët s’janë përplasur ta marrin kryesimin e aksionit).
Tritani: Mos me fol mua ashtu.
Sakaq, pas këtij momenti ka nisur një debat verbal mes dy demokratëve.
Ndërkohë mësohet se grupi parlamentar ka autorizuar Gazment Bardhin për të marrë pjesë tek Konferenca e Kryetarëve.
