Interi ka kryer edhe seancën e fundit stërvitore në Milano, për t’u nisur drejt Madridit, aty ku mbrëmjen e të mërkurës do të përballet me Atleticon e Simeone, për një vend në fazën çerekfinale të Ligës së Kampionëve.
Zikaltrit nisen nga avantazhi minimal 1-0 që siguruan në përballjen e parë në “San Siro” dhe janë një hap përpara “Los Colchoneros”, teksa trajneri Simone Inzaghi pritet të rigjejë nga minuta e parë dyshen Lautaro-Thuram, që nuk luajnë bashkë që nga ndeshja e parë ndaj Atleticos në “San Siro”.
Dy sulmuesit kanë lënë pas dëmtimin dhe do të provojnë të udhëheqin Interin drejt çerekfinaleve, teksa krahas ndeshjes, drejtuesit e klubit zikaltër do të ketë edhe një mision tjetër të rëndësishëm në Madrid.
Bëhet fjalë për rinovimin e kapitenit Lautaro, që ka ngecur pasi oferta dhe kërkesa janë dy milionë euro larg njëra-tjetrës dhe diferencën pritet ta bëjnë pikërisht bonuset që do të ofrojnë zikaltrit për sulmuesin.
Agjenti i Lautaros, Alejandro Camano pritet të jetë në Madrid për ndeshjen dhe jozyrtarisht bëhet me dije se do të takohet edhe me Marottën e Ausilion, për të provuar të afrohen edhe më shumë me rinovimin.
Kontrata e kapitenit me Interin skadon në verën e 2026-ës dhe për momentin nuk ka asnjë nxitim, megjithatë zikaltrit duan ta ‘blindojnë’ sulmuesin para verës, për të mos rrezikuar ta humbin nga ndonjë ofertë tunduese.
