Pas marrëveshjes së arritur këtë të martë mes mazhorancës dhe opozitës në Konferencën e Kryetarëve për rikthimin e normalitetit në parlament, PD do të mbledhë grupin parlamentar.
Kreu i Grupit Parlamentar i PD-së, Gazment Bardhi ka njoftuar kolegët deputetë se mbledhja do të zhvillojnë nesër (13 mars), ndërsa bëri me dije se sërish nesër do të ketë një tjetër mbledhje të Konferencës së Kryetarëve, në orën 13:30.
Përmes një mesazhi drejtuar kolegëve demokratë, ai i informoi në lidhje me çfarë është rënë dakord me mazhorancën në mbledhjen e Konferencës së Kryetarëve, për rikthimin e jetës normale parlamentare.
Bardhi bën me dije se në parim u ra dakord që;
-Të ushtrohet e drejta e opozitës për ngritjen e Komisioneve Hetimore, duke filluar në këtë sesion parlamentar me ngritjen e 2 Komisioneve Hetimore që u rrëzuan në 12 Tetor, duke u tërhequr nga vendimet në atë seancë;
-Të ngrihet me vendim të Kuvendit një Nënkomision për Reformat, që përbëhet nga 4 anëtarë (2 GPPS – 2 GPPD). Ky nënkomision është përgjegjës për diskutimin/shqyrtimin e paketave ligjore, reformave dhe ligjeve që kërkojnë shumicë të cilësuar apo ligjeve që kërkojnë gjithëpërfshirje, përfshirë ligjet që janë të nevojshme për procesin e integrimit europian. Komisioni merr vendimet me konsensusin e të gjithë anëtarëve dhe më pas i kalon aktet e dakordësuara për shqyrtim/miratim në seancë plenare;
-Të miratohet një kalendar konkret për shqyrtimin, diskutimin dhe votimin e ligjeve të propozuara nga deputetët. Kryetarja e Kuvendit kujdeset që Komisionet Parlamentare të zbatojnë kalendarin konkret të miratuar nga Konferenca e Kryetarëve.
