Kryetari i Partisë Demokratike, Sali Berisha përsëriti thirrjen për qeveri teknike sërish këtë të martë.
“Miqtë e mi, ka ardhur koha në një betejë në mosbindje civile, t’i shkurtojmë ditët kësaj qeverie. Të krijojmë qeverinë teknike në mënyrë që shqiptarët të zgjedhin me votën e lirë përfaqësuesit e tyre”, theksoi kryedemokrati në fjalën e mbajtur gjatë protestës poshtë banesës së tij.
Berisha shprehu bindjen se opozita do të mundë socialistët në kushtet e garantimit të votës së lirë.
“Të votojnë me votën e lirë opozitën dhe unë i garantoj qytetarët shqiptarë se PD do bëjë gjithçka për një ndryshim të shpejtë, të plotë, të fuqishëm të gjendjes katastrofale. Po dhe po. Në Shqipëri nuk do sundojnë bandat, po do sundojë ligji dhe vetëm ligji. Në Shqipëri me gërshërët e ligjit do t’i priten duart atij që do të guxojë të prekë pasurinë publike, të vjedhë të ardhurat tuaja, taksat tuaja. Në Shqipëri, pasuritë do të kthehen në mirësi për qytetarët. Në dyfishim rrogash, dyfishim pensionesh, në përmirësim cilësor të arsimit, në garantimin e një shërbimi shëndetësor dinjitoz, efiçent, siç e meritoni. Shqipëria do jetë vendi ku liritë dhe të drejtat e qytetarëve do respektohen, do të garantohen. Ku libri themelor i shtetit, Kushtetuta do sundojë mbi çdo ligj tjetër”, shtoi Berisha.
Kryedemokrati u shpreh se po mbahet nën arrest për një vendim të vitit 2008 që qytetarët të përdornin letrat me vlerë për objektet në privatizim, ndërsa shtoi se Edi Rama miratoi sot pas 16 vitesh zgjatjen e afatit të përdorimit të tyre. Berisha tha se kjo është “drejtësia e monstrës Xhorxh Soros”.
Kreu i PD-së përsëriti akuzat ndaj gjyqtares Irena Gjoka, e cila këtë të martë, rrëzoi kërkesën e mbrojtjes së kryedemokratit për të shfuqizuar masën e sigurisë së arrestit në shtëpi. Berisha tha se, gjyqtarja me tre mbiemra “është përzënë për vepra llumi, por atë po e mbulon Edi Rama”.
Ai u shpreh se Edi Rama inauguroi një urë në Rrugën e Kombit dhe kërkon ta shesë si naftën e Shpiragut. Berisha shtoi se nuk ka normë morale që Edi Rama nuk ka thyer.
Kryetari i PD deklaroi se nëpërmjet TEC-it të Vlorës janë vjedhur 200 milionë euro, ndërkohë që gazi nga TAP nuk e furnizoi kurrë.
