Gjykata e Lartë do të shqyrtojë sot kërkesën e familjarëve të Aleks Nikës, një prej 4 viktimave të demonstratës së 21 Janarit 2011, të cilët kanë kërkuar që çështja të kalojë në dorën e Prokurorisë së Posaçme, duke prishur vendimin e dy shkallëve të mëparshme të gjyqësorit dhe të urdhërojë SPAK-un të regjistrojë procedimin penal.
Seanca gjyqësore do të zhvillohet sot në orën 13:00 me trupin gjykues Ilir Panda, Sokol Binaj dhe Sandër Simoni. Ata do të vendosin përfundimisht se kujt i takon për ta hetuar çështjen e “21 Janarit”, Prokurorisë së Tiranës apo Prokurorisë së Posaçme (SPAK).
Seanca ishte planifikuar që të mbahej që më 27 shkurt, por Kolegji i Gjykatës së Lartë e shtyu, pasi vlerësoi të nevojshëm dëgjimin e palëve për shkak se çështja paraqet rëndësi nga pikëpamja e së drejtës, për njësimin ose zhvillimin e praktikës gjyqësore.
Aleks Nika është një nga 4 protestuesit që u vra në demonstratën e mbajtur nga Partia Socialiste më 21 janarit të vitit 2011. Kërkesa e familjes Nika ka përfunduar në Gjykatën e Lartë pasi GJKKO dhe Apeli i GJKKO e rrëzuan.
Në rekursin e bashkëshortes së Aleks Nikës, thuhet se Prokuroria e Tiranës e ka mbajtur hetimin për 21 janarin për 2 vjet e 6 muaj pa bërë asnjë veprim për zbardhjen e ngjarjes. Prokuroria e Posaçme ka shpallur moskompentencë, jo vetëm për padinë e familjarëve të depozituar më 16 shkurt të këtij viti, por edhe atë të bërë nga Ministria e Drejtësisë dhe Partia Socialiste.
