Kryetari i Partisë Demokratike, Sali Berisha, ka folur këtë të enjte në tubimin qytetar që po mbahet poshtë banesës së tij, për 7 marsin festën e mësuesve.
Gjatë fjalës së tij, Berisha u shpreh se mësuesit në Shqipëri kanë pagat 30-40 përqind më të ulëta se në Kosovë.
Ai akuzoi qeverinë se kjo e fundit është sjellë në mënyrë barbare me sistemin arsimor në vend, pasi ka 3-fishuar rrogat e zyrtarëve dhe nuk ka vlerësuar mësuesit.
Pjesë nga fjala e Berishës:
Miqtë e mi, asnjëherë dhe kurrë nuk do kesh sistemin arsimor që do në rast se mësuesin, mësuesen nuk e vendos në piedestalin që meriton.
Ky është kushti i parë për të pasur arsimin e duhur, edukimin e duhur.
Çfarë ndodhi me mësuesit këto 10 vite?
Këto 10 vite, mësuesit shqiptarë, nga mësuesit më të paguar të të gjithë Ballkanit dhe rajonit, falë një politike që synonte mësuesin në piedestal, ata sot kanë rrogat më të ulëta. 30-40 përqind më të ulëta se në Kosovë.
Ndërkohë, rrogat e larta të ofiqarëve të lartë dy dhe trefishohen.
Rrogat e mësuesve sot, krahasuar me inflacionin e 4 viteve të fundit, jo të 10 viteve, por vetëm të 4 viteve të fundit, janë 40 përqind më të ulëta.
Rilindja është vërtetuar një barbari e vërtetë për sistemin arsimor.
U bënë përpjekje të mëdha për modernizimin e këtij sistemi me shpenzime serioze, por vullnetin e hekurt. E shndërruam internetin nga mollë e ndaluar për fëmijët shqiptarë, në një mjet, në një univers në të cilin mund të lundronte falas çdo fëmijë i këtij vendi.
Mësimi jepej me dy-tre turne. Hoqëm turnet në shkolla dhe rindërtuam mbi 1300 objekte shkollore në mbarë vendin.
Pra, bëmë çdo gjë miqtë e mi që ta merrnim, ta trajnonim në mënyrën më serioze arsimin shqiptar, mësueset dhe mësuesit, të bindur se kjo është rruga e vetme për të përgatitur të ardhmen tonë.
Rezultatet nuk munguan, dihet tashmë se ne patëm ngjitje vertikale, u bëmë njëri nga vendet me ngjitjen më vertikale në testin e PISA-s për cilësinë e arsimit.
Sot është një ditë flamuri në gjysmë shtizë për arsimin shqiptar, sepse PISA e këtij viti, që përfshinte tetë vitet e sektit të Rilindjes në pushtet, shënoi për fatin tonë më të keq, rënien më të madhe në botë të cilësisë së arsimit.
A nuk është kjo një arsye për të ulur në gjysmë shtizë flamurin në arsimin tonë?
