Nga Boldnews.al
Kryebashkiaku i Tiranës Erion Veliaj e ka të qartë se për të ka vetëm dy rrugë: ose të pensionohet politikisht në moshën 47 vjeç, (kohë kur i mbaron mandati), ose të marrë kreun e PS-së, para se Rama të pendohet dhe t’ia dhurojë dikujt tjetër… Strategjia e Veliajt është mëse e qartë se karriera e tij politike varet kryesisht nga një njeri.
Prej dhjetë ditësh Erion Veliaj ka lënë çdo punë në bashki, (me përjashtim të rasteve kur firmos për tendera) dhe ka dalë në terren për të gjetur të rinj me tru të larët dhe shpëlarë nga “lavatriçja propagandë” e Rilindjes dhe tu japë në duar teserën e PS-së. Ka një arsye më shumë që të bjerë në sy të të madhit. Veliaj u kritikua nga Rama teksa ky i fundit si rrallherë e përçudnoi në sy të të tjerëve duke i thënë se: “I ke kthyer takimet politike si mbledhje OJQ-je”…
Veliaj s’kish zë për ta kundërshtuar, por veproi me “mend”, teksa heshti para shefit dhe po mundohet të bëjë politikë, duke zbatuar një nga urdhrat kryesorë të Ramës për të hapur sa më shumë partinë. Bashkëpunëtorëve të tij në bashki dhe në njësitë administrative po u kërkon me ngulm që të gjejnë sa më shumë të rinj të cilët pranojnë të anëtarësohen në PS.
Burime për Boldnews.al shprehen se pavarësisht se është vënë në shërbim e gjithë kupula politike e PS-së së Tiranës dhe një numër i madh punonjësish, nuk kanë siguruar numrat që kërkon Veliaj. Arsyeja është fare e thjesht: Nuk ka më të rinj, shumë kanë ikur si emigrantë dhe të tjerë që kanë mbetur nuk durojnë fasadën e pushtetit e cila në 11 vite qeverisje ka mbjellë varfëri, korrupsion, pasiguri dhe emigrim masiv.
Prej pak ditësh presioni për të gjetur anëtarë të rinj ka rënë edhe në administratën poshtë, duke u kërkuar punonjësve të thjesht që me hir apo pahir, të gjejnë ku të duan të paktën nga tre të rinj që pranojnë të marrin teserën e PS-së. Gjithashtu Veliaj mundohet që qimen ta bëjë tra teksa hedh në rrjetet sociale “takimet e suksesshme” me anëtarët e rinj. Në fakt sallat janë me nëpunës të anëtarësuar prej kohësh dhe atë teserë e tundit si “doktoraturë”. Edhe vetë militantët e thekur shprehen se e kanë të vështirë t’i mbushin mendjen të rinjve të mbetur që të bëhen anëtarë të PS-së, pavarësisht mashtrimeve se me një “teserë të tillë gjen punë kudo”.
Çfarë do të shesë lali para tyre, që e ka betonizuar Tiranën aq shumë sa tashmë është bërë qytet i pajetueshëm? Çdo u thotë nëse i përmendin shifrën e frikshme se në tetë vitet e fundit janë rritur shtafish në kryeqytet sëmundjet kanceroze nga ndotja e ajrit? Si mundet që një të riu t’i mbushë mendjen që të bëhet “militant partie” teksa do i duhen katër jetë për të blerë një banesë?
Të ndodhur në vështirësi anëtarësimet e reja në qarkun e Tiranës po shkojnë drejt dështimit, ku Veliaj edhe pse e ka të qartë se përgjegjësia nuk është tërësisht e tij, padyshim që nuk do të guxojë që të akuzojë “ustain”, pasi çiraku çirak mbetet, për aq kohë sa ende nuk mban çelësat e mejhanes ku shërben.
