Dy persona humbën jetën dhe shtatë të tjerë u plagosën nga shpërthimi që u regjistrua pasditen e së premtes në një magazinë në Lushnje.
Dy ditë pas ngjarjes së rëndë, 3 nga personat e plagosur vazhdojnë të qëndrojnë në spital, mes tyre edhe deputeti i PS, Bujar Çela.
Sokol Lumi dhe Bujar Çela, ndodhen ende nën kujdesin e mjekëve në spitalin e Traumës, ndërsa në Lushnje ndodhet Sajmir Korreshi i cili ka cifla nga shpërthimi në duar. Nga raportimet e deritanishme thuhet se gjendja e tyre është stabilizuar, dhe jashtë rrezikut për jetën.
Ndërkohë kryetarja e bashkisë së Lushnjës, Eriselda Sefa tha se ‘është përgatitur grupi i ekspertëve dhe ditën e hënë do të fillojë verifikimi i të gjitha banesave dhe bizneseve të cilët janë dëmtuar nga shpërthimi’, raporton News24.
Sakaq ditën e djeshme Prokuroria nisi hetimet në dy pista. Përpos pistës së vjetër, ku dyshohet se shpërthimi erdhi pasi vinçieri preku telat e tensionit të lartë, pista e re është saldimi pranë bombolave të gazit.
