Policia ka vënë arrestuar dy grabitës dhe ka shpallur në kërkim bashkëpunëtorin e tyre, të cilët në dy muajt e fundit të vitit të kaluar terrorizuan Qarkun e Tiranës, me disa grabitje apo tentaiva grabitjes nën kërcënimin e armës.
Në kuadër të operacionit policor të koduar “Blind”, janë vënë në pranga shtetasit:
– Klodjan Cypi, 37 vjeç, banues në Fushë Krujë, i dyshuar për kryerjen e veprave penale “Vjedhja me armë”, e kryer në bashkëpunim, mbetur në tentativë, “Vrasja e punonjësit të Policisë së Shtetit”, mbetur në tentativë, “Mbajtja pa leje dhe prodhimi i armëve, armëve shpërthyese dhe i municionit”,
– Kleotild Bardhi 32 vjeç, banues në Laç, i dyshuar për kryerjen e veprave penale “Mbajtja pa leje dhe prodhimi i armëve, armëve shpërthyese dhe i municionit”, dhe “Veprime që pengojnë zbulimin e së vërtetës”.
Gjithashtu, është shpallur në kërkim bashkëpunëtori i tyre, shtetasi F. T., i dyshuar për kryerjen e veprave penale “Vjedhja me armë”, e kryer në bashkëpunim, mbetur në tentativë, “Vrasja e punonjësit të Policisë së Shtetit”, mbetur në tentativë, “Mbajtja pa leje dhe prodhimi i armëve, armëve shpërthyese dhe i municionit”.
Sipas autoriteteve policore, këta shtetas janë autorë të ngjarjes së regjistruar mbrëmjen e 9 Dhjetorit në fshatin Prush të Tiranës, ku kanë tentuar të grabisnin banesën e shtetasit Gim Hima, por sapo konstatuan efektivët e Policisë, ata u larguan, duke qëlluar dhe me armë zjarri në drejtim të tyre.
Po ashtu, sipas autoriteteve, ata dyshohet se janë autorë dhe të ngjarjes së ndodhur më 28 nëntor, ku është vjedhur një argjendari në Kamëz. Gjithashtu, dyshohen si autorë dhe të vjedhjes së mbetur në tentativë, të një biznes në rrugën Vorë-Tiranë.
Policia bën me dije se ka sekuestruar dy armë zjarri pistoleta të çmontuara, të gjetura në banesën e shtetasit Kleotild Bardhi, një automjet, 8 aparate celulare dhe tre karta sim, dhe një pajisje GPS.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
