Kreu i PBDNJ-së Vangjel Dule e ka konsideruar një gjueti shtrigash arrestimin e Fredi Belerit, i cili ndodhet në qeli prej rreth 10 muajsh.
Dula shprehet se është kundër shit-blerjes së votave duke theksuar se ky fenomen duhet çrrënjosur, por sipas tij, në rastin e Fredi Belerit nuk ka asnjë provë dhe fakt.
“Në mënyrë kategorike jemi kundër shitblerjes së votave, por edhe kundër gjuetisë së shtrigave.
Nuk ka asnjë fakt, asnjë provë të vetme që Beleri ishte duke shit-blerë votat. Pretendohet se Kokaveshi dha kartëmonedha në të cilat nuk gjendet shenja të gishtave të atij që akuzohet për këtë gjë. Tek zyra elektorale për zgjedhjet e 14 Majit në Himarë deputeti i PS kishte vendosur thirrje për qytetarët që të dërgonin dokumentacionet për të marrë titujt e pronësisë. Ky është korrupsion parazgjedhor.
Duhet t’i jepet fund shit-blerjes së votave, por nuk mund të bëhet nëse mbyllen dosjet si ajo 184, u bëmë gazi i botës në gazetën Bild.
Fenomeni duhet çrrënjosur por jo me gjueti shtrigash”, tha Vangjel Dule.
Vangjel Dule akuzoi kryeministrin Rama se para zgjedhjeve “përgatiti opinionin publik, me nxitjen e nacionalizmit të sëmurë për të përgatitur atë që do të ndodhte”.
“Kjo është çështje që nisi në 6 maj nga kryeministri Rama. Nisi në fushatën zgjedhore në Himarë, ku u evidentuan 2 elemente të papranueshëm për një fushatë zgjedhore. Së pari, denigrimi i figurës së Belerit me fyerje dhe bullizëm të papranueshëm dhe së dyti, me shpifje. Duke shtrembëruar një intervistë në median greke, Rama përgatiti opinionin publik, me nxitjen e nacionalizmit të sëmurë për të përgatitur atë që do të ndodhte. Në 6 maj, kur Beleri nuk ishte në Himarë, nisi procesi i përgjimit të tij telefonim e ambiental nga 15 oficerë. Pasi nuk gjetën asnjë fakt, bënë një arrestim demonstrativ të tij në qendër të Himarës. Nga 6 maji deri në 12 maj, përgjimet e Belerit dhe bashkëpunëtorëve u shoqëruan në anën tjetër me retorikën e thirrjeve nacionaliste të Ramës”.
Sipas Dules “asnjë nga 31 rastet e “korrupsionit” zgjedhor në SPAK nuk përfundoi në “arrest në burg”. Të tjerë kryebashkiakë që ndiqeshin penalisht janë zgjedhur e janë betuar. Këto shkelje përbëjnë një zinxhir të gjatë”.
