Ish-ministri i Shëndetësisë, Ilir Beqaj, ashtu si çdo të premte, edhe ditën e sotme është paraqitur në SPAK, për të respektura vendimin “detyrim paraqitje” të marrë ndaj tij nga GJKKO për aferën e sterilizimit.
Pas daljes nga godina e SPAK, Beqaj ka dhënë një prononcim të shkurtër për gazetarët, ku është pyetur se kur kërkon hetimet më të thelluara për sterilizimin, a mos e ka fjalën për pasardhësen e tij në Shëndetësi, Ogerta Manastirliu. Beqaj tha se ka kërkuar që të hetohet pse nuk u vu në punë për tre vite qendra e re e sterilizimit.
Gazetari: Kur thoni qe duhen të hetohen njerëz të tjerë e keni pasur fjalën për Manastirliun?
Ilir Beqaj: Unë kam kërkuar që hetimet të vlerësojnë pse nuk u vu në punë për 3 vite dhe gjithashtu të vlerësojnë arritjet fantastike në 8 vite që zbatohet kontrata.
Kujtojmë se ministrja e Arsimit dhe Sportit, Ogerta Manastirliu u paraqit të hënën që kaloi në SPAK ku qëndroi për 2 orë e 15 minuta. Ajo deklaruar shkurtimisht për mediat se u mor në pyetje në cilësinë e personit që ka dijeni mbi çështjen e sterilizimit në kohën kur ka drejtuar Qendrën Spitalore Universitare Nënë Tereza (QSUT).
Në dosjen e SPAK theksohet se qendra e re e sterilizimit ishte inaguruar në vitit 2010-2011 dhe ish-ministri i Shëndetësisë, Ilir Beqaj ka marrë shkresë nga Ogerta Manastirliu, ish-drejtoreshë e QSUT-së në vitin 2014, për ta vendosur në punë, pasi kapaciteti i saj mbulonte 60 mijë ndërhyrje kirurgjikale.
Beqaj nuk e mori fare në konsideratë kërkesën, por i hapi rrugë koncesionit për mikun e tij, Ilir Rrapaj, siç rezulton nga hetimet.
Ndërkohë, GJKKO ka caktuar ndaj Ilir Beqajt masën e sigurisë “detyrim paraqitje” në lidhje me aferën e sterilizimit, ndërsa ai po hetohet dhe për korrupsion dhe fshehje pasuri në lidhje me abuzimet me fondet e SASPAC, por ende nuk ka një akuzë të ngritur ndaj tij. Oficerët e BKH-së kanë ushtruar kontroll në banesën e Ilir Beqajt dhe kanë sekuestruar telefonin, kompjuterin dhe dokumente të tjera. Kontrolle janë ushtruar edhe në banesat e 5 anëtarëve të tjerë të SASPAC.
Kujtojmë se çdo të premte, Ilir Beqaj duhet të paraqitet në orën 15:30 para oficerit të BKH-së, në lidhje me masën “detyrim paraqitje” të caktuar ndaj tij
