Gjykata e Posaçme ka rrëzuar kërkesën e SPAK për pushimin e çështjes ndaj Lulzim Berishës për vrasjen e biznesmenit Vajdin Lamaj dhe mikut të tij Artan Arsin, ngjarje kjo e ndodhur në vitin 2005.
GJKKO ka vendosur t’i kthejë dosjen SPAK-ut për plotësim hetimesh dhe i la 4 muaj afat Prokurorisë së Posaçme. Lulzim Berisha u arrestua disa javë më parë në Spanjë dhe Shqipëria ka nisur procedurat e ekstradimit të tij.
Kujtojmë se prokurorët e çështjes Altin Dumani dhe Alfred Shehu dolën në konkluzionet se në vrasjen e Vajdin Lamaj dhe Artan Arsinit nuk provohet të kenë marë pjesë dy personat nën hetim, Lulzim Berisha dhe ish-kunati i tij, Plaurent Dervishaj. Përgjatë 3 vitesh hetime të kryera, ata nuk mundën të provonin implikimin e dy figurave kryesore të krimit në vrasjen e dyfishte me tritol të ndodhur në muajin Shkurt 2005 në Tiranë.
Nisur nga kjo situatë, dy prokurorët e SPAK, vendosën të kërkonin pushimin e ndjekjes penale për Dervishajn dhe Lulzim Berishën, por tani u duhet ta hetojnë sërish.
Për vrasjen e Lames akuzohen dhe Emiliano Shullazi dhe Viktor Ymeri, të cilët janë marë të pandehur dhe vijon procesi gjyqësor.
