Edhe seanca e sotme plenare në Kuvend, ka qenë e ngjashme me të kaluarat, ku mazhoranca kalon me shpejtësi dhe pa diskutime projektligjet në rendin e ditës, duke u mbyllur për pak minuta.
Tensionet nuk kanë munguar, ku deputetët e Partisë Demokratike me pankarta në duar kanë bllokuar foltoren, teksa kanë ndezur edhe zhurmues duke moslejuar zhvillimin e një seance normale.
Shtatë deputetë e përjashtuar të PD-së; Flamur Noka, Gazment Bardhi, Ervin Salianji, Bledion Nallbati, Asllan Dogjani, Petrit Doda, Edi Paloka nuk u paraqitën sot në Kuvend, duke shmangur përplasjen e kolegëve të tyre demokratë me efektivët e Gardës në hyrje të godinës.
Fillimisht, kryetarja e Kuvendit, Lindita Nikolla e ka nisur seancën me interpelancën e kërkuar nga grupi i deputetëve të Lulzim Bashës me kryeministrin Edi Rama në lidhje me akuzat e ish-zv.kryeministri Arben Ahmetaj të bëra rreth dy javë më parë në një intervistë për Syri Tv.
Kryeministri Edi Rama nuk ishte i pranishëm në seancën e sotme dhe ia kishte “deleguar” interpelancën ministres së Shtetit, Elisa Spiropali. Deputeti i PD Arbi Agalliu nuk pranoi ta bënte interpelancën me Spiropalin, duke bërë që kryetarja e Kuvendit të kalonte direkt në votimin e projektligjeve.
“Rama të mos fshihet pas Elisës dhe Blinkenit”, tha shkurtimisht Arbi Agalliu, teksa pati një incident dhe me kolegen demokrate Elda Hoti, e cila i mbylli mikrofonin.
Pas nuk u realizua interpelanca, deputeti Lulzim Basha braktisi seancën dhe në një prononcim për mediat nga oborri i Kuvendit, paralajmëroi padi në SPAK në lidhje me inceneratorët dhe akzat e Ahmetajt.
“Inteperlancë të bëra para dy javësh. Numridy e akuzoi se është de Facto pronar i inceneratorëve. Është e qartë që sot Edi Rama ka përdorur nga njëra ana vizitën e Blinken për tu fshehur nga një detyrim kushtetues. I leverdis Edi Ramës që mos të ketë parlament që mos të përgjigjet para opozitës. Keqardhje që ky skenar bëhet nga deputetë të opozitës. PD nuk dorëzohet para këtij realiteti para këtij teatri të qartë që luajnë me njëri tjetrin. PD do të dorëzojë javën e ardhshme padi penale në SPAK bazuar mbi fakte, duke përfshirë pohimet e Ahmetajt, që përfitues si vërtetë është Edi Rama dhe për Blerim Hoxhën që ka vjedhur para nga inceneratorët. Nuk është sensi i parlamentarizmit dhe demokracisë. siç e dini kushtetuta e Shqipërisë kryeministrin e mban përgjegjës për çdo akt. Ahmetaj ka thënë përfitues i aferës së inceneratorëve është Edi Rama dhe e ka thënë numri 2 i tij. Ne javën e ardhshme depozitojmë padi për shtyp.” – tha Basha.
Pasi nuk u pranua interpelanca, kryetarja e Kuvendit Lindita Nikolla kaloi direkt në miratimin e projekt-ligjeve, pa diskutime, siç ka ndodhur në shkelje të ligjit prej muajsh tashmë në Kuvend.
Një ndër ligjet e votuara sot në Kuvend është dhe rikthimi i basteve sportive, 5 vite pas mbylljes po nga kjo Qeveri, ku kryeministri Edi Rama nuk nguronte të propagandonte me fjalët “Fundi i Marrëzisë”. Ky ligj u miratua me 72 vota pro dhe 2 abstenim, ajo e Erion Braçes dhe Fatmir Xhafajt.
E drejta për ta ushtruar këtë aktivitet do t’i jepet vetëm 10 operatorëve dhe përzgjedhja e tyre do të realizohet nëpërmjet një komisioni të veçantë.
Projektligji është kundërshtuar nga opozita si një rrezik potencial për pastrimin e parave. Qeveria e targetoi tregun e paligjshëm të lojërave të fatit përmes operacionit “Fundi i Marrëzisë” në vitin 2013, dhe në vitin 2015, miratoi një ligj që u komentua si radikal për frenimin e kësaj industrie.
Megjithatë, lojërat e fatit lulëzuan edhe më shumë pas miratimit të ligjit të ri, çka e shtyu qeverinë të vendoste ndalimin e plotë të tyre në vjeshtën e vitit 2018. Por, pavarësisht mbylljes, bastet sportive sërish kanë vazhduar aktivitetin në mënyrë ilegale.
Gjithashtu, në seancën e sotme plenare socialistët miratuan dhe propozimin për të shpallur 22 Nëntorin, një festë zyrtare. Dita e Alfabetit të Gjuhës Shqipe do të jetë ditë pushimi duke nisur nga ky vit. Kongresi i Manastirit shënohet si ngjarja më e madhe historike e kombit tonë dhe vlerësohet për rëndësinë e tij të institucionalizimit të alfabetit të gjuhës shqipe.
Kujtojmë se prej më shumë se tre muajsh, deputetët e Partisë Demokratike kanë vijuar aksionin e tyre në Kuvend për të moslejuar seanca normale, deri në realizimin e kërkesave të tyre kushtetuese, për ngritjen e komisioneve hetimore dhe ndryshimin e përbërjes së anëtarëve të opozitës në komisionin e posaçëm të reformës zgjedhore.
Mazhoranca i është përgjigjur me arrogancë opozitës, me përjashtime masive të deputetëve, miratimin e ligjeve pa diskutime me forcën e Gardës në Kuvend, si dhe me miratimin e një rregullore të re të Kuvendit, ku ashpërsonte përjashtimet e deputetëve, duke e çuar deri nga 30 deri në 60 ditë.
