Marrëdhëniet në rajon dhe ato Kosovë-Serbi kanë qenë temë e diskutimit në takimin e zhvilluar në ambientet e kryeministrisë mes kryeqeveritarit Edi Rama dhe Sekretarit Amerikan të Shtetit, Antony Blinken.
Këtë e konfirmoi Rama gjatë konferencës së përbashkët për mediat me Blinken pas takimit. Kryeministri shigjetoi me kritika qeverinë e Kosovës së drejtuar nga Albin Kurti, që aktualisht po kalon një ngërç me partnerët amerikanë për çështjen e dinarit serb.
“Shtetet e Bashkuara të Amerikës kanë qenë, janë dhe do të mbeten mbështetëse të palëkundura të njohjes përfundimtare të Kosovës dhe të përmbushjes së subjektivitetit ndërkombëtar të Kosovës dhe është mirë që asnjëherë shqiptarët kudo ku janë, duke filluar nga shqiptarët në Kosovë të mos të harrojnë se pa Shtetet e Bashkuara nuk do të kishte një shtet të pavarur të Kosovës dhe se interesi i Shteteve të Bashkuara në këtë rajon dhe specifikisht interesi i Shteteve të Bashkuara për mbarëvajtjen e punëve në Shqipëri dhe në Kosovë nuk është një interes i dorës së dytë, nuk është as një interes i ndarë në çfarëdo aspekti nga interesi ynë në Shqipëri dhe Kosovë për të ndërtuar një të ardhme në paqe dhe në prosperitet për gjeneratat e tjera“, tha Rama.
“E pa diskutim që ne ndihemi të keq ardhur sa herë që shohim hapa mbrapa dhe pa diskutim që ne jemi të vetëdijshëm për vështirësinë e këtij dialogu. Pa diskutim ne jemi të vetëdijshëm për dhimbjen e plagëve të një tragjedie jo shumë të largët për ata që sot jetojnë në Kosovë, padyshim jemi të vetëdijshëm edhe për faktin që në momente të caktuara, sic ishte rasti i sulmit terrorist në Banjskë. Serbia nuk është se e ndihmon siç duhet gjithmonë procesit por ama, në radhë të parë shqiptarët e Kosovës dhe pastaj të gjithë ne së bashku, duhet të jemi të vetëdijshëm se është në interesin tonë, është në interesin e Kosovës që të përparojë unilateralisht nëse është nevoja në realizimin e të gjitha atyre kërkesave që janë në tryezën e dialogut të cilat nuk janë kërkesa shtrënguese. Nuk janë as kërkesa që Kosova të lëshojë 1 milimetër nga dinjiteti, sovraniteti dhe ardhmëria e vet, por janë kërkesa që bëjnë të mundur përmes realizimit të tyre krijimin e një konteksti që e ngre lart Republikën e Kosovës si një republikë që e meriton të gjithë mbështetjen, të gjithë respektin, të gjithë besimin e aleatëve dhe partnerëve tanë strategjikë pa të cilët e ardhmja bëhet shumë më e largët dhe e tashmja bëhet shumë më e ndërlikuar”, shtoi.
“Prandaj, edhe sot, pasi kemi diskutuar, unë dua ta përsëris apelin tim, apelin tonë për autoritetet e Prishtinës që të mos bëjnë asnjë hap të pa konsultuar dhe të pa koordinuar me aleatët tanë strategjikë sepse është, në radhë të parë, në interesin e tyre dhe patjetër pastaj është në interesin e aleancës sonë“, theksoi Rama.
Ai aludoi se Albin Kurti po del kundër partnerëve amerikanë për përfitime elektorale. “Nga veprimet e pa konsultuara dhe të pa koordinuara mbase mund të fitohen disa vota sot për sot, duke e kthyer politikën e jashtme në një instrument të politikës së brendshme por nuk fitohet e ardhmja”, tha.
Gjatë fjalës së tij, Edi Rama falënderoi SHBA për mbështetjen që sipas tij i ka dhënë Shqipërisë në fusha të ndryshme, duke përmendur këtu edhe drejtësinë.
Marrëdhëniet dypalëshe i vlerësoi dhe Blinken, i cili bëri me dije se muajin e ardhshëm Shqipëria do të përurojë bazën e NATO-s në Kuçovë.
Lidhur me raportin Kosovë-Serbi, ai tha se dialogu është “shtegu i vetëm i duhur”.
“Jemi të angazhuar të mbështesim të gjitha përpjekjet për të çuar përpara integrimin e vendeve të Ballkanit Perëndimor me njëri-tjetrin dhe me Ballkanin Perëndimor, me njëri-tjetrin dhe me Evropën. Sa i takon Kosovës dhe Serbisë, dialogu i lehtësuar nga BE-ja është i duhuri dhe shtegu i vetëm i duhur. Ne jemi të angazhuar të bëjmë gjithçka që duhet për të mbështetur të dyja vendet ndërsa kalojnë këtë shteg. Gjithashtu dua të përgëzoj rolin e Shqipërisë sepse ka qenë një forcë për stabilitet rajonal, integrim rajonal dhe progres rajonal. Ne e dimë se cila është alternativa, sepse e kemi parë, ndaj jemi të vendosur të mbështesim vendet e rajonit të kalojnë në shtegun e dialogut të lehtësuar nga BE-ja”, tha Blinken.
