Komisioni i posaçëm për reformën zgjedhore u mblodh online këtë të premte, në një seancë me përfaqësues të organizatave që kanë fushë të përgjegjësisë së tyre çështjet zgjedhore. Përfaqësues të organizatave ngritën shqetësime për mekanizmat që janë përdorur rëndom nga qeveria në zgjedhje për manipulimin e votave.
Greta Meta nga SHKD shprehu shqetësim për veprimtarinë e patronazhistëve.
Erion Tase nga ASP propozoi të mos jepen shpërblime nga institucionet shtetërore gjatë fushatave elektorale.
Shqetësime u shprehën edhe në lidhje me financimet e subjekteve politike, apo shpenzimet e tyre në rrjetet sociale.
Vildan Plepi nga NDI kërkon ngritjen e një strukture për ndalimin e investimit të partive nga subjekte të huaja.
Ervis Çela nga “Shqipëria Behët” propozoi vendosjen e listave të hapur në një sistem proporcional kombëtar. Adriatik Lapaj nga e njëjta organizatë tha se “për të nxjerrë një mandat në Kukës duhen 5 mijë vota më shumë se në Vlorë dhe kjo është e padrejtë”. Gjithashtu shtoi se nga kjo organizatë janë depozituar në institucionet shtetërore të linjës propozime për ndalimin e aktivitetit të patronazhistëve, të përdorur nga Partia Socialiste në pushtet.
Lidhur me votën e diasporës, u shpreh kundër propozimit të qeverisë për krijimin e një databze për emigrantët. “Më gjeni një vend të botës që kërkojnë një databazë për emigrantët që të votojnë. Në Kosovë ka? Jo. Po si votojnë emigrantët. Në gjithë botën s’kërkohet databzë se një emigrant mund të jetojë sot në Uashington, pastaj shkon në Teksas. Si e bëjnë shtetet e tjera? 60 ditë para zgjedhjeve hapet portali online ku emigrantët fusin dokumentacionin përkatës”, tha ai.
Premto Gogo nga KRRIK u shpreh se mohimi i së drejtës së diasporës për të votuar në zgjedhje, në terma juridikë, i bën këto zgjedhjet antikushtetuese.
Altin Goxhaj nga “Lëvizja Politike ShpresON” renditi 15 propozime mes të cilave hapjen e listave, komisione zgjedhorë të përbërë nga profesionistë të lirë dhe jo militant partish, votë me postë për emigrantët përmes bashkëpunimit me kompani prestigjioze të fushës, patronazhistët të konsiderohet përndjekës nga Kodi Penal.
Nga deputetët, prezentë ishin ligjvënës të mazhorancës dhe ata të grupit Basha. Munguan deputetët demokratë, të cilët kërkojnë zëvendësimin e Enkelejd Alibeajt me Oerd Bylykbashin, me argumentin se ai nuk përfaqëson Partinë Demokratike.
